БНСУ-д “COVID-19”-ийн вакцинжуулалтад хамрагдсан байдлыг ухаалаг гар утасны хавсралтаар дамжуулан баталгаажуулах цахим системийг энэ сард танилцуулна хэмээн Ерөнхий сайд Чон Се Гюн мэдэгджээ.
Тэрбээр “Иргэд вакцины паспорт буюу ногоон картын тусламжтайгаар хэвийн байдалдаа эргэн орох боломж бүрдэнэ” гэжээ. Ерөнхий сайдын хэлснээр, Засгийн газар уг системийг хэдийн хөгжүүлсэн бөгөөд энэ сард танилцуулахаар төлөвлөж байгаа гэнэ.
БНСУ-д “COVID-19”-ийн вакцинжуулалтын хөтөлбөрийг энэ оны хоёрдугаар сарын 26-нд эхлүүлснээс хойш 850 мянга гаруй хүн вакцин хийлгэжээ. Тус улс ирэх зургаадугаар сар гэхэд 12 сая хүнийг дархлаажуулж, арваннэгдүгээр сар гэхэд сүргийн дархлаа тогтоохыг зорьж байгаа аж.
