Жүжигчин У.Цогтбаяртай ярилцлаа.

----------------------

-Уран бүтээлч хүнтэй уулзсаных сүүлийн үеийн уран бүтээлийн сонин сайхнаар ярилцлагаа эхэлье гэж бодлоо. Шинэ жүжгээ нээх гээд их л завгүй байх шиг байна?

-2026 оны анхны уран бүтээлдээ орчихсон. Жүжгийн бэлтгэл гээд их завгүй өдрүүд өнгөрч байна. Жүжигчин хүн болгон сургуулиа төгсөхдөө хүсдэг нэг зүйл нь драмын жүжигчин болох байдаг. Миний хувьд ч ялгаагүй УДЭТ-т орох юмсан гэж боддог байсан. Тэр мөрөөдлөө биелүүлэх жил болж байна. “Хэрмэл крю”-гийн найзуудтайгаа хамтраад 20 жил өмнө X Tuts продакшны ах, эгч нарын тайзнаа амилуулж байсан "Хориотой жүжиг" гэх жүжгийг “Орфей театр”-ынхантайгаа хамтарч тавихаар жүжгийн бэлтгэлдээ орчихсон байна.

-Таныг инээдмийн хошин дүрүүдээр ихэвчлэн харсан болохоор драмын жүжгийн гол дүрд тайзнаас харна гэхээр төсөөлөгдөхгүй байна. Танд ямар санагдаж байна?

-Сургуулиа төгсөөд хошин урлагийн продакшнд ороод тэр цагаас хойш ихэвчлэн тэр чиглэлийн уран бүтээлүүдэд ажилласан болохоор амар биш байна. Гэхдээ жүжигчний хувьд маш их зүйлийг сурч, өөрийгөө хөгжүүлсэн өдрүүд өнгөрч байна. Жүжигчин мэргэжлийг эзэмшсэн хүн учраас би тийм л дүрд тоглодог гэж өөрийгөө хайрцаглаад байхгүй. Өөр өөр жанраар өөрийгөө сорьж үзмээр байна.

-Үсээ ягаанаар будуулаад хумсаа улаанаар будуулчихсан байгаа тань анхаарал татаж байна. Шалтгааныг нь асууж болох уу?

-Хүмүүс янз бүрээр л хүлээж авч байх шиг байна. Би "Хориотой жүжиг"-т 20 гаруй настай залуугийн дүр бүтээж байгаа учраас дүрдээ орохын тулд өөртөө ийм өөрчлөлт хийсэн. Би 30 гарчихсан. Гэр бүл, үр хүүхэд гэсэн аав болчихсон байгаа учраас 20 настай залуугийн дүрийг тайзанд амилуулах амар биш. Тиймээс ийм шийдвэр гаргасан.

-Хүмүүс яаж хүлээж авч байна?

-Амьхандаа нууж байгаа ч хүмүүс хараад л байна. Гоё байна гэх хүн байхад гомо гэж хүлээж авах хүмүүс ч байна. Гомо байтлаасаа 3 хүүхдийн аав болчихсон байх уу. Ардчилсан нийгэмд ягаанаар үсээ будуулахад гайхахгүй болчихсон байх байтал өмссөн зүүсэн, өнгө зүсээр нь ялгаж, амны зугаа болгоод байдгийг үнэхээр ойлгодоггүй юм. Ер нь гомо байсан ч танд хамаатай юу. Жаахан хүний эрхийн мэдрэмжтэй байцгаая л гэж хэлмээр санагдсан.

-Хар тамхи хэрэглэсэн гэх шуугиан хэдхэн хоногийн өмнө дэгдээд амжсан. Энэ талаар тодорхой мэдээлэл өгч болох уу?

-Би дэлгүүр дээрээ ажиллаж байгаад, рекламны зураг авалтад оролцохоор дэлгүүрээ хаагаад гарсан юм. Гэтэл ганц нэг хүн над руу залгаад “Хувцас авах гэсэн юм. Холоос зорьж ирлээ” гэж хэлсэн. Би дэлгүүр дээрээ яараад иртэл “Түр хаалгаа хааж байгаач” гэсэн. “Яагаад вэ” гэтэл цагдаагийн үнэмлэхээ үзүүлээд “Хар тамхитай тэмцэх албанаас явж байна. Таныг дэлгүүр дээрээ хар тамхи хэрэглэсэн байна гэсэн дуудлага ирсэн” гэсэн. Би хар тамхи хэрэглээгүй ч тухайн үедээ айсан. Хэрэглээгүй байхад хэрэглэсэн гээд дуудлага өгчихсөн байгаа юм чинь хэрэглээгүй байхад шинжилгээнээс хийсэн гээд гараад ирэх вий дээ гэж айсан учраас олон нийтэд хандсан. Баримтжуулж, олон нийтээр өөрийгөө хамгаалуулах зорилгоор гэх юм уу. Нөгөө талаараа миний үнэт цагийг хомсолж байгаа юм. 12 сорьцын шинжилгээ өгөөд буцаад ирэхэд дэлгүүр маань хаах цаг болсон байсан. Бүтэн өдөр ямар ч орлогогүй, 4-5 цагийг тэнд зарцуулсан. Хэрэв дэлгүүртээ зогсож байсан бол хамгийн багадаа 2-3 куртик зарчихсан байгаа шүү дээ. Хэн, яагаад, ямар зорилгоор тийм худал мэдээлэл өгч, Цогтоо хар тамхичин гэх худал мэдээлэл түгээхийг хүссэнийг нь мэдэхгүй юм.

-Та 2023 онд 44 их наядын нүүрсний хулгайн асуудлаар талбай дээр жагсаж, үзэл бодлоо илэрхийлсэн. Үүнтэй холбоотойгоор сайн, муу, сайхан, муухай олон л зүйлийг туулсан байх. Одоо ч таныг дагасаар л байгаа. Та ер нь харамсдаг уу?

-Үгүй. Харин ч бахархахыг хүсдэг. Гэхдээ яг энэ үйл явдалтай холбоотойгоор надад сөрөг зүйл маш их ирдэг. "Чи мөнгө авсан. Чи будилуулсан" гэдэг. Гэсэн хэдий ч би харамсахгүй юмсан гэж боддог. Хэрэв би харамсвал би биш болчихно. Тэр миний хүссэн зүйл биш. Би зүгээр л тэр өдөр нэг юмны манлай болчихсон. Бүгд л миний үгэнд орсон. Миний бүх ярилцлага хамгийн их хандалт авсан. Товчхондоо бол би хамгийн зоригтой санагдсан байгаа юм. Нэлээн тэнэг хүнээс л ийм зориг гардаг юм байна гэдгийг дараа нь ойлгосон. Одоо хүртэл энэ миний дотоод зөрчил болоод явдаг.

-Та уран бүтээлч хүн улс төртэй холбогдож сайн, муугаар хэлүүлээд явах нь урлагийн хүний хувьд реклам сурталчилгаа, уран бүтээлийн саналаас эхлээд сөргөөр нөлөөлдөг зүйл байдаг уу?

-Би өмнө нь төрийн агентуудын арга хэмжээнүүдийг хөтөлдөг байсан. Тэр орлого жагсаалаас хойш бүр байхгүй болчихсон. Улс төржсөн уран бүтээлчдээс хол байх чиглэлийг дээрээсээ авчихдаг юм шиг байгаа юм. Товчхондоо бол төрийн хатуу хавчлага дор хүндхэн жилүүдийг өнгөрүүлж байна. Гэхдээ тэглээ гээд би өлсөөд үхчихгүй. Талх зараад ч болтугай амьдарна.

-Хувийнхаа бизнесийг эхлүүлсэн гэсэн үүнтэй холбоотой юу?

-Тийм. Би чинь 3 хүүхдийн аав учраас ядаж л хадгаламжтай байх хэрэгтэй байгаа юм. Тэгэхийн тулд жүжигчний ажлынхаа хажуугаар өөр ажил хийх шаардлага зайлшгүй тулгарсан. Тиймээс лангуу нээгээд өөрөө зогсож эхэлсэн. Манай дэлгүүр нээгдээд 4-хэн сар болж байгаа ч 3.5 сая төгрөгөөр худалдаж авсан куртикнууд маань өнөөдөр 30 сая төгрөгөөр эргэж байна. Би нэг куртик зарахаараа киноны нээлтийн үеэр улаан хивсэн дээгүүр алхахаас илүү их баярладаг. Яагаад би эрт эхлээгүй юм бол оо гэж хүртэл бодогддог. Харамсалтай нь эрт эхлэх талаар бодсон ч ичээд эхлээгүй. Одоо би юунаас ч ичихгүй. Би хүүхдүүдээ тэжээхийн төлөө амьдарч байгаа эцэг хүн. Хүүхдүүдээ боловсролтой болгохын тулд куртик зарж байгаа юм. Тиймээс надад ичих шаардлага байхгүй.

-Түрүүн ярьсан Цогтоог муухай харагдуулах гэсэн худал мэдээллүүдийг их тараадаг гэж. "Хар тамхичин, хүчирхийлэгч, төлбөртэй жагсагч" гэх мэт. Сүүлийн үед "Эхнэрээсээ салсан. Эхнэр нь өөр хүнтэй ..." гэх мэт. Үүнд тайлбар өгөх боломжтой юу?

-Миний одоо амьдарч байгаа бодит нөхцөл байдал гэвэл яг одоо эхнэртэйгээ чатлаад байж байна. Манай эхнэр лангуун дээрээ сууж байгаа. "Нэг куртик зарчихлаа" гээд чат бичсэн байна. Иймэрхүү зүйлийг сонсохоор бид хоёрын хооронд сэв суух гээд байдаг. +17 гарснаас хойш би өөрийгөө мөнгөний машин гэж бодож байсан. Магадгүй эхнэрийгээ хайраар дутаасан байх. Яагаад гэвэл надад цаг зав байгаагүй. Амьдрана гэдэг чинь асар их ухаан. Одоо ч би суралцаад л явж байна. Гэхдээ би 3 хүүхдийг минь төрүүлж өгсөн ханийхаа төлөө бүх зүйлээ зориулаад л гүйнэ. Өөр хүнд сэтгэл алдарвал тэр л биз. Би 3 хүүхдэдээ 3 үл хөдлөхийнхөө нэрийг бичиж өгөөд явуулж чадах тийм л эр хүн. Би эхнэртээ хайртай. Өөр хүнд сэтгэл алдарсан гэж хэлээгүй. Хоёр биендээ итгэсэн хэвээрээ л байгаа. "Өөр хүнтэй болсон. Салсан" гээд байгаа хүмүүст баримт байвал дэлгээч ээ л гэж хэлмээр байна.

-Ярилцсанд баярлалаа.