Чөлөөт бөхийн 2025 оны Азийн аварга шалгаруулах тэмцээн Йордан Улсын нийслэл Амман хотод үргэлжилж байна. Тэмцээний эмэгтэй төрлийн сүүлийн таван жингийн барилдаан өчигдөр болж 65 кг-д хүч сорьсон Монголын бөх Т.Энхжин мөнгө, 72 кг-д хүч сорьсон З.Болортунгалаг хүрэл медаль авлаа.

З.Болортунгалаг залуучуудын олимпын мөнгө, хүрэл медальт, өсвөр, залуучуудын Азийн АШТ-ий мөнгө, хүрэл медальт, ДАШТ-ий 5-р байрын шагналт Узбекистаны Светлана Окназароваг даралтаар цэвэр ялсан юм. Ингэснээр З.Болортунгалаг тивийн АШТ-ээс тав дахь хүрэл медалиа хүртэж байна. Тэрбээр мөн 2021 оны Азийн АШТ-д түрүүлсэн билээ.