Төв аймгийн Өндөрширээт сумын нутаг дэвсгэрт байх Талын уул гэх газар буюу Улаанбаатар-Арвайхээр чиглэлийн авто замын 170 дахь км-ийн ойролцоо Toyota Hiace маркийн түргэний машин Улаанбаатараас Завхан аймгийн чиглэлд зорчиж явсан Kia Grandbird маркийн том оврын автобустай мөргөлдсөн харамсалтай осол гарч, түргэний автомашинд явсан жолооч, эмч, өвчтөн нарын 6 хүн газар дээрээ нас барсан талаар бид мэдээлсэн.

Тодруулбал, ослын улмаас түргэний машинд сууж явсан 6 хүн газар дээрээ нас барж, 2 хүүхэд ГССҮТ-д хүргэгдсэн байна.

Ослын талаар цагдаагийн байгууллагаас тодруулахад, "Цагдаагийн байгууллагад энэ сарын 11-ний өдөр 19.00 цагийн орчимд Төв аймгийн Өндөрширээт сум “Талын-Уул гэх газарт автомашинууд мөргөлдөж, хүн нас барсан байна” гэсэн мэдээлэл бүртгэгдсэн. Ослын улмаас Toyota Hiace маркийн түргэний машинд зорчиж явсан 5 хүн, жолоочийн хамт нийт 6 хүн нас барж, 2 хүүхэд гэмтсэн" гэлээ.

Бид ГССҮТ-д хүргэгдсэн хүүхдүүдийн биеийн байдал ямар байгаа талаар тус эмнэлгээс тодруулахад, "Манай эмнэлэгт хүргэгдэж ирсэн хоёр хүний биеийн байдал хүнд, эрчимт эмчилгээний тасагт хэвтэн эмчлүүлж байна. Нас, онош гэх мэт хувийн мэдээллийг нь өгөх боломжгүй" гэлээ.