Иргэд нийтийн тээврээр зорчих “U Money” картаа гар утаснаасаа цэнэглэдэг боллоо. Гар утсандаа олон улсын стандарт бүхий “Hi-pay wallet” апликэйшн татан авч, дурын банкны картаа холбож цэнэглэхээс гадна хэрэглээний түүхээ харах, үлдэгдэл шалгах боломжтой. Үүний тулд ямар нэг шимтгэл, хураамж төлөхгүй юм.

Түүнчлэн, U money картаа утаснаасаа цэнэглэсэн хэрэглэгч бүрт автобусанд бүтэн жилийн турш үнэгүй зорчих эрхээр шагнах сугалаат аян зарлаж байна. Долоо хоног бүр 5 азтан шалгаруулж, нийт 10 долоо хоногийн турш 50 хүнийг азтанаар тодруулна. Нийслэл хотод давхардсан тоогоор өдөрт 650-700 мянган зорчигч нийтийн тээврээр үйлчлүүлдэг статистик тоо бий. Нийтийн тээврийн автоусаар үйлчлүүлэх зориулалттай “Улаанбаатар смарт карт” ХХК пластик картыг одоогоор 2,3 сая хэвлэснээс 1,3 сая нь идэвхтэй хэрэглэгдэж байна. Карт уншигч төхөөрөмжийг 1300 автобусанд байршуулж, банкны ПОС, хүнсний дэлгүүр зэрэгт карт цэнэглэх 1000 гаруй цэг ажиллаж байна.