“Эх, хүүхэд, нөхөн үржихүйн эрүүл мэнд арга хэмжээний 2021-2024 оны төлөвлөгөө”, Эрүүл мэндийн яамны Удирдлагын зөвлөлийн хурлын шийдвэрийн хэрэгжилтийг эрчимжүүлэх, Эх барихын тусламж, үйлчилгээнд мөрдөж байгаа эрхзүйн орчныг шинэчлэх хүрээнд санал солилцох уулзалт өчигдөр болжээ.

Эх, нярайн эрүүл мэндийн тусламж, үйлчилгээний чанар, хүртээмжийг нэмэгдүүлэх, жирэмсэн, төрөх, төрсний дараах үед эх, нярайд цогц тусламж үйлчилгээ үзүүлэхэд эх баригчдын оролцоо нэн чухал байдаг. Олон улсад хэвийн төрөлтийг эх баригчид бие даан удирдаж, эх барихуйн тусламжийг багаар үзүүлдэг.

Манай улсын хувьд Эрүүл мэндийн сайдын 2017 оны “Эх баригчийн ажлын байрны тодорхойлолтын үлгэрчилсэн загварыг шинэчлэн батлах тухай” А/216 дугаар тушаалын хүрээнд эх баригчид хэвийн төрөлтийг эх барих, эмэгтэйчүүдийн эмчийн удирдлага дор удирддаг зохицуулалттай.

Цаашид эх баригчийн ажлын байрны тодорхойлолтод гардан хийх тусламж, үйлчилгээний цар хүрээг өргөжүүлэх өөрчлөлт оруулах шаардлагатай гэж мэргэжилтнүүд санал нэгдсэн байна.

Мөн эрүүл мэндийн тусламж, үйлчилгээний санхүүжилтийн тогтолцоотой уялдуулан жирэмсэн, төрөх, төрсний дараах үед үзүүлэх тусламж, үйлчилгээний зохицуулалтын журам, жагсаалтыг шинэчлэн өөрчлөх ажлыг шуурхай зохион байгуулах нь зөв гэж үзсэн болохыг Эрүүл мэндийн яамнаас мэдээллээ.