УИХ-ын Төрийн байгуулалтын байнгын хорооны өнөөдрийн хуралдаанаар Засгийн газарт чиглэл өгөх тухай Байнгын хорооны тогтоолын төслийг хэлэлцлээ.

Уг тогтоолын төсөлд Үндэсний их баяр наадмын тухай хуулийн 10 дугаар зүйлийн 10.19 дэх хэсэгт заасныг баримтлан Үндэсний их баяр наадмын хөтөлбөрт жороо морины уралдааныг оруулж зохион байгуулахыг Монгол Улсын Засгийн газар, Зохион байгуулах хорооны дарга, Монгол Улсын Шадар сайдад даалгахаар тусгажээ.

Тодруулбал, УИХ-ын гишүүн Ш.Адьшаа, Д.Тогтохсүрэн нараас УИХ-ын даргад тавьсан саналын дагуу Төрийн байгуулалтын байнгын хорооноос дээрх тогтоолын төслийг боловсруулсан гэдгийг хуралдаан даргалагч тодотгосон юм.

Тогтоолын төсөлтэй холбогдуулан асуулт гараагүй бөгөөд хуралдаанд оролцсон гишүүдийн олонхын саналаар Байнгын хорооны тогтоолыг баталлаа.