Өнөөдөр өглөө МАН-ын Удирдах зөвлөлөөс Ерөнхийлөгчийн сонгуульд нэр дэвшүүлэхээр сонгосон У.Хүрэлсүхийн материалыг СЕХ-нд хүргүүлсэн. Үүнийг хороо хүлээн авсан байна.
Харин О.Цогтгэрэл даргатай АН-аас Н.Алтанхуяг нэр дэвших материалаа СЕХ-нд хүргүүлсэн ч хүлээж авсангүй. СЕХ-ны дарга П.Дэлгэрнарангийн хувьд Үндсэн хуулиар нэг намаас нэг л хүн нэр дэвшинэ гэж заасан учир АН-ын хоёр нэр дэвшигчийг бүртгэх боломжгүй хэмээн тайлбарлав. Иймд материал хүлээж авах хугацааг өнөөдрийн 18:00 цаг хүртэл хойшлууллаа. Үүнд АН-ын бүлгийн дарга Д.Ганбат, УИХ-ын гишүүн О.Цогтгэрэл нар эсэргүүцлээ илэрхийлж, УИХ-ын гишүүн Н.Алтанхуяг материалыг хүлээж авахгүй бол эндээс гарахгүй гэв.
