АНУ-ын тэрбумтан, Илон Маскын үүсгэн байгуулсан “Neuralink” компани нь хүний тархийг компьютертэй холбох технологийг хөгжүүлдэг. Тус компани тархинд нь чип суулгасан макака сармагчингаар энгийн компьютер тоглоом тоглуулж туршиж буй бичлэгээ цацжээ.

   Гурван минут үргэлжилж буй бичлэг дээр Пэйжер нэртэй сармагчин тоглоомыг бодлоороо удирдаж байгааг харуулсан байна. Гэхдээ эхлээд жойстикээр тоглоомыг удирдаж эхлүүлээд дараа нь жойстикийг салгаж, сармагчны тархинд суулгасан чипнээс ирэх сигналыг компьютерт холбосон байна. Харин урамшуулалд нь сармагчинд гадилын шүүс ялгаруулдаг гуурсыг зуулгажээ. Хэрэв чипийг хүний тархинд амжилттай суулгаж чадвал уг чипний тусламжтай ирээдүйд саажилт, альцхаймер, деменц буюу тэнэгрэх өвчтэй хүмүүсийг эмчлэх боломжтой болох гэнэ.