ОХУ-аас авах коронавирусний эсрэг 1.3 сая тун "Спутник-V" вакцины эхний ээлжийг Монгол Улс энэ сарын 10-нд хүлээн авна.

Тодруулбал, Монгол Улсын Засгийн газар болон Улсын онцгой комиссоос “Спутник-V” вакцин худалдан авах хүсэлтийг ОХУ-д тавьсан. Энэ дагуу Монголд нэг сая тун вакцин нийлүүлэх болсноо ОХУ-ын Аж үйлдвэр, худалдааны сайдын үүрэг гүйцэтгэгч Сергей Анатольевич Цыб өнгөрсөн сарын 26-нд Шадар сайд С.Амарсайхантай цахим уулзалт хийхдээ онцолж байсан юм. Мөн тэрбээр, ОХУ-аас худалдан авах гэрээний хүрээнд нийлүүлэх нэг сая тун вакцинаас гадна тусламжаар 300 мянган тун “Спутник-V” вакцин олгох болсныг дурдаж байна.

Үүний дагуу 1.3 сая тун "Спутник-V" вакцины эхний хэсэг энэ сарын 10-нд ирнэ. Харин энэ сарын дундуур үлдсэн хэсэг нь ирэх аж.