Эртнээс нохой бол хүний сайн найз байсаар ирсэн билээ. Иймд барууны орнууд тэр дундаа Итали, Герман, Америкийн зарим мужуудын томоохон хүүхдийн эмнэлгүүд эмчилгээнийхээ нэг хэсэгт нохойны тусламжийг авах болжээ.

Анх 2010 оноос хүүхдийн эмнэлгүүд “Сарвуу ба тоглох” хөтөлбөрийн хүрээнд тусгай командаар бэлтгэгдсэн нохдыг эмнэлгийн ажилд туслуулах болсон байна. Ингэхдээ нохойнд танихгүй хүнд эелдэг байх, зайлшгүй командуудыг мэддэг байх, насанд хүрсэн байх зэрэг шалгуур тавьдаг бөгөөд үүнд нийцэж байвал үүлдэр нь хамаагүй гэнэ. Нохойг эмнэлгийн яаралтай үед орноосоо босох гэх мэт хурдан дохио өгөхөд бараг дадлагажуулсан байдаг.

Эдгээр ноход ихэнх тохиолдолд эмнэлгийн амьдралд дасахгүй байгаа хүүхдүүдэд туслах, чөлөөтэй харьцах боломж олгох, стресс бууруулах зэргээр туслахын зэрэгцээ өвчнөө давж гарах итгэл найдвар өгдөг байна. Зарим тохиолдолд дайны дараах дайчдын сэтгэл зүйг засахад туслах зорилготой ажилладаг.

Нохойтой эмчилгээнд мэргэшсэн Профессор Амос, “Хүүхдүүд эмээ уух тун дургүй. Гэхдээ нохойдоо эм өгч буй дүр эсгэн ус тавганд нь хийдэг. Хэрэв нохой уувал хүүхэд ч бас эмээ уудаг. Энэ мэтээр нохойны ашиг тус эмчилгээг үр дүнтэй болгодог” хэмээжээ. Орчин үед эмнэлэг гэлтгүй хүнд өвчтэй хүмүүс гэртээ ч эмчилгээний нохойтой болохыг хүсдэг болсон тул үрчилж авсан нохойгоо сургах нь түгээмэл болов. Иймд мэргэшсэн эмч мэргэжилтэн болон ном товхимол бий болжээ.

Эмнэлгийн нохой нь нэг талаар гэрийн тэжээвэр амьтан боловч үүнээс илүүтэй ажилтан гэх статустай өвчтөнтэй хамт байдаг аж. Нэг эмнэлэгт 5-10 ажилтан нохой байх бөгөөд өвчтөний хэвтэж буй өрөөнөөс ирүүлсэн хүсэлтийг харгалзан илгээдэг байна. Эмчилгээний нохой өвчтөнд эдгэхэд нь туслахдаа өөрөө ч бас аз жаргал мэдэрдэг болох нь батлагджээ. Ихэнхдээ амьтдыг сэтгэлийн түгшүүрийг арилгах, ганцаардлын мэдрэмжийг бууруулах, цусны даралтыг бууруулахад ашигладаг.

Саяхан Синай уулын хүүхдийн эмнэлэгт Профессор Бунсен Хондейв хэмээх энэ 3 настай “голден дудл” үүлдрийн нохой VIP ажилтнаар тодорчээ. Тэрбээр олон өвчтөнд эмнэлэгээс гарахад нь тусалсан туршлагатай бөгөөд өөрийн гэсэн нэрийн хуудастай болоод амжсан байна. Түүний одоогийн өвчтөн 7 настай Закира Уильямс цусны өвчтэй бөгөөд шинжилгээ хийлгэх бүртээ профессортой хамт явдаг гэнэ.

Ихэнх эмчилгээний ноход өвчтөнтэй уулзахын өмнө үргэлж усанд ордог бөгөөд  хантаазныхаа нуруу хэсэгт “Намайг тэжээ, би найрсаг байх болно” гэсэн бичигтэй байдаг. Эдгээр эмчилгээний нохдын зардлыг эмчилгээний байгууллага болон сайн дурын хандиваар зохицуулдаг. Өвчтөнүүд нохойг номын сан, кафе зэрэн олон нийтийн газраар дагуулж явах хориотой юм.  Сонирхуулахад жилээс жилд "Сарвуу ба тоглох" хөтөлбөр олширч байгаа бөгөөд ноход дан ганц хүүхдийн эмнэлэгт бус хөгжлийн бэрхшээлтэй иргэдэд нийгэмтэй харилцахад нь тус болж байна.