"Камертон" хамтлагийн ахлагч, дуучин Д.Болдын ээж, Гавьяат жүжигчин нэрт дуурийн дуучин Ж.Цэцэг хэдхэн хоногийн өмнө таалал төгссөн харамсалтай явдал болсон билээ. Тэгвэл дуучин Д.Болд ээжийгээ сэрүүн тунгалаг үед "Камертон" хамтлагийн "Сэтгэлийн хүч" хэмээх уран бүтээлд ээжтэйгээ хамтран дуулжээ. Тэрбээр энэ тухай өөрийн цахим хуудастаа "Сэтгэлээр унасан үе, баярласан үе гээд үргэлж ээждээ ховлон эрхлэн ярилцаж байдгаа дуу болгон бүтээж хайртай ээжтэйгээ амжиж дуулжээ…

Хоёулаа хамт дуу дуулна шүү гэдэг хүслийг нь хүү нь биелүүлж чадсандаа жоохон ч гэсэн баярлаж сууна даа.

Миний ганц хайртай ээж минь аз жаргалтай тайван нойрс доо " хэмээсэн байна.

Түүний ээж Ж.Цэцэг агсан дуурийн дуучин мэргэжилтэй, 2015 онд Гавьяат жүжигчин цол тэмдгээр энгэрээ мялаасан хүн байв. Харин түүний аав морин хуурч нэгэн байсан бөгөөд аавыгаа даган урлагийн салбарт хөл тавьж, хүүгээ ч мөн урлагийн хүн болгосон ажээ.