Монгол Улсын Засгийн газар "Төрийн нууцад хамаарах мэдээллийг ил болгох тухай” тогтоолын төслийг баталснаар “Эрдэнэс Тавантолгой” ХК-иас бусад хуулийн этгээдтэй 2020-2022 онд “Нүүрс нийлүүлэх гэрээ”-ний хүрээнд байгуулсан гэрээ, тэдгээрт холбогдох мэдээллийг компанийн цахим хуудаст нээлттэй байршуулсан. Ил болгосон нууцлал бүхий 40 гэрээнээс 32 нь Бодь Интернэшнл ХХК-тай байгуулсан гэрээ байна. Үүнтэй холбоотойгоор өнөөдөр ТББХ-ны үеэр УИХ-ын гишүүн Л.Оюун-Эрдэнэ "Бодь”-той холбоотой асуудлыг ярих цаг болсон. Г.Занданшатар дарга өөрийнхөө хийсэн ажилд хариулах цаг ч болсон. “Бодь”-ийн оффтейк гэрээ явж байхад Г.Занданшатар ЗГХЭГ-ын дарга байсан. Би ажлыг нь авч байсан" гэсэн юм.
Тэгвэл түүний илэрхийлсэн байр суурьтай холбоотойгоор УИХ-ын гишүүн Б.Энхбаяр "2023 оны 12-р сарын 18-ны өдөр “Нүүрсний хулгай”-тай холбоотой УИХ-ын сонсголд “Маш нууц” байсан бөгөөд нууцаас гаргасан оффтейк гэрээнүүд, түүнтэй холбоотой эрх зүй, эдийн засгийн дүгнэлтийг хянан шалгагч нээлттэй танилцуулсан. Бодь компанитай байгуулсан оффтейкүүд Л.Оюун-Эрдэнийн Засгийн газрын үед нууцад авагдаж байгуулагдсаныг эндээс харж болно. Л.Оюун-Эрдэнэ дарга маань оффтейкүүдаа өөрөөсөө асуувал зохино. Нүүрсний сонсголыг нөхөж үзэцгээ" гэжээ.
