Өнөөдөр УИХ-ын Төрийн байгуулалтын байнгын хороогоор Г.Занданшатарыг Ерөнхий сайдаар томилохыг дэмжих эсэх асуудлыг хэлэлцэж, олонх нь дэмжсэн. Улмаар УИХ-ын чуулганы хуралдаанаар дээрх асуудлыг хэлэлцэж, гишүүд асуулт асууж хариулт аван, үг хэллээ.
Эцэст нь, Г.Занданшатарыг Ерөнхий сайдаар томилохыг дэмжье гэсэн саналын томъёоллоор санал хураахад, 117 гишүүний 110 нь буюу 94 хувь нь дэмжсэн тул Гомбожавын Занданшатарыг Монгол Улсын 34 дэх Ерөнхий сайдаар томилсонд тооцлоо.
Ингэснээр тэрбээр албан ёсоор үүрэгт ажилдаа орж байна. Одоо тэрбээр хамгийн эхэнд Засгийн газрын бүтэц, бүрэлдэхүүнээ тодруулж томилох учиртай.
