УИХ дахь Аюулгүй байдал, гадаад бодлогын байнгын хорооны хуралдаанаар БНПУ-д суух онц бөгөөд бүрэн эрхт элчин сайдаар УИХ-ын гишүүн Н.Оюундарийг томилох тухай асуудлыг хэлэлцэж дэмжсэн бөгөөд мөн гадаадын зарим улсад харилцан визгүй зорчих асуудлаар ГХ-ны сайдаас гишүүд асуулт асууж, хариулт авлаа.
УИХ-ын гишүүн, Гадаад харилцааны сайд Б.Батцэцэг: Манай улс НҮБ-ын бүх гишүүн орнуудтай дипломат харилцаа тогтоож дууссан байгаа. Украин улстай найрсаг, хамтын ажиллагаагаа хөгжүүлээд олон жил болж байна. Саяхан бид олон улсын Эрүүгийн шүүхтэй холбоотой асуудлаар Украинд манай дипломатууд очиж ажилласан. Бид харилцан визгүй зорчих хэлэлцээрийг дайн болохоос өмнө байгуулсан. Одоо зөвхөн ЗГ-ын хуралдаанаар хэлэлцүүлэх процедурын ажил үлдсэн байна. Манай тал удахгүй визгүй болгох шийдвэрээ Украины талд өгнө гэдгээ албан ёсоор Гадаад харилцааны сайдад нь мэдэгдсэн байгаа.
