УДШ-ээс өнгөрөгч оны 11 дүгээр сарын 5-нд О.Цогтгэрэл талын АН-ын зохион байгуулсан “Онц их хурал”-ыг хүчин төгөлдөр гэж үзээд буй. Тэгвэл үүнтэй холбогдуулж УИХ-ын гишүүн О.Цогтгэрэл талын АН-ынхан АН-ын даргын сунгаа зохион байгуулж, шинэ даргаа тодруулахаар болсон. Энэ сунгаанд Ерөнхийлөгч асан Х.Баттулга оролцож, нэр дэвшинэ гэдгээ өчигдөр /2022.03.11/ албан ёсоор илэрхийллээ. Экс Ерөнхийлөгчийн тус шийдвэртэй холбогдуулан АН-ын гишүүдийн дунд маргаан үүсч эхлээд байна. Ямартай ч сунгаа болох хугацаандаа зохион байгуулагдаж, үргэлжлэх нь ч тодорхой.

Тэгвэл АН-ын даргын сунгаанаас өмнө өрнөх нэг процесс нь Ерөнхийлөгч асан Х.Баттулгын АН-ын гишүүнчлэлээ сэргээх явдал юм. Түүний хувьд 2017 онд Ерөнхийлөгч болсон даруйдаа хуулийн дагуу намын гишүүнчлэлээсээ татгалзсан. Тиймээс ойрын өдрүүдэд намын гишүүнчлэлээ сэргээж таарна.

Х.Баттулгын намын гишүүнчлэлээ сэргээх үйл явцад АН-ын дотор дахин маргаан үүсэх нь тодорхой. Тодруулбал, Х.Баттулга намын гишүүнчлэлээ сэргээж, намын батлахаа авахдаа С.Эрдэний талаас авах уу, О.Цогтгэрэлийн талаас авах уу. Өнгөрсөн хугацаанд АН-ын дотор болж буй үйл явдлын ард Х.Баттулга бий гэх яриа байсаар ирсэн. Харин О.Цогтгэрэлын талаас намын батлахыг өгвөл С.Эрдэнийн талынхан эцсээ хүртэл тэмцэх нь ойлгомжтой. Ийнхүү АН-ын хэрүүлийн сэдэв нэгээр нэмэгдэж, энэ хаврын турш улс төржих нь тодорхой боллоо.