Шадар сайд С.Амарсайхан, Эрүүл мэндийн сайд С.Энхболд нар өнөөдөр БЗД-ийн нэгдсэн эмнэлэгт ажиллалаа. Мөн тандалтаар явж буй өрхийн эмнэлгийнхэнтэй уулзсан байна.

Энэ үеэр НЭМГ-ын дарга Б.Бямбадорж "Орны эргэлт удаашралтай байна. Өмнө нь яаралтай тусламжаар авсан хүмүүсээ эмнэлгүүд рүү хуваарилж болж байсан. Одоо нэгдсэн эмнэлгүүдийн ачаалал их тул хуваарилах боломжгүй болоод байна. Хэвтэх шаардлагатай хүмүүс гэртээ эмчлүүлж байна. Гэртээ хүчилтөрөгч авсан ч бие нь муудаж байна. 200 гаруй хүн хүчилтөрөгчийн зайлшгүй хэрэгтэй, эмнэлэгт хэвтэх шаардлагатай байна. Яаралтай тусламж дээр авах гэхээр орнууд нь дүүрчихсэн асуудал хүнд байна. Мөн халдвар авсан жирэмсэн эмэгтэйчүүдийг бүгдийг нь хэвтүүлэх боломжгүй байна" гэлээ.

Шадар сайд С.Амарсайхан "Утсаар өгөх зөвлөгөөгөө өргөн хүрээнд хийх хэрэгтэй. Орны тоогоо нэмэгдүүлж, зохион байгуулалтаа сайжруулах шаардлагатай. Өдөр ирэх тусам халдварын тоо нэмэгдэж, хүн хүч дутагдаж байгааг ойлгож байна. Нэг ч иргэн гадаа орхигдож болохгүй. Эмнэлэгт хэвтэхээр ирсэн иргэдээ шууд хүлээн авах тасагтаа хүлээн авч, анхан шатны тусламж үзүүлэх шаардлагатай. Нааш цааш гүйлгээд байдаг асуудлаа болих хэрэгтэй" гэлээ.