БНСУ-д ажиллах хүсэлтэй иргэдийн Солонгос хэлний түвшин тогтоох энгийн шалгалт өнөөдөр эхэлж байна. Тодруулбал, Солонгост ажиллах хүсэлтэй иргэдийн бүртгэлийг энэ оны зургадугаар сарын 29, 30-ны өдөр цахимаар зохион байгуулж, нийт 3,469 иргэн бүртгүүлсэн байсан юм. Солонгос хэлний түвшин тогтоох энгийн шалгалтыг БНСУ-ын аж үйлдвэрийн хүний нөөцийн хэрэг эрхлэх газраас ирүүлсэн хуваарийн дагуу өнөөдрөөс эхлүүлсэн аж. Тус шалгалт нь аравдугаар сарын 19 хүртэлх хугацаанд ХХҮЕГ-ын байранд өдөрт дөрвөн ээлжээр зохион байгуулагдах юм. Шалгалтыг халдвар хамгааллын дэглэмийг өндөр түвшинд ханган зохион байгуулах бөгөөд хариуг арваннэгдүгээр сарын 3-ны өдөр зарлах аж.

Харин БНСУ-д хөдөлмөрийн гэрээгээр ажиллаж байгаад визний хүчинтэй хугацаандаа нутаг буцаж ирсэн, дахин хөдөлмөрийн гэрээгээр ажиллах хүсэлтэй иргэдийн Тусгай шалгалтад 83 иргэн бүртгүүлжээ. Тусгай шалгалтыг есдүгээр сарын 28-ны өдөр зохион байгуулж, хариуг аравдугаар сарын 20-нд зарлана гэдгийг ХХҮЕГ-аас мэдээллээ.

Энгийн болон тусгай шалгалтад тэнцсэн иргэд нь БНСУ-ын Хөдөлмөрийн биржид ажил хайгчийн 2022, 2023 оны нөөцөд орох аж.