Нийслэлд болон орон нутагт дархлаажуулалтын ажил үргэлжилсээр байна. "Спутник V” вакцины хоёрдугаар тунг өчигдөр буюу Даваа гарагаас эхлэн 65-аас дээш насныханд хийж эхэлсэн билээ. Тэгвэл өчигдөр буюу долдугаар сарын 5-нд нийслэлийн хэмжээнд I тунд 5523, II тунд 4743, нийт 10266 иргэн дархлаажуулалтад хамрагджээ. Ингэхдээ жирэмсэн эх 170, 12-15 насны 3887, 16-17 насны 981 хүүхдийг дархлаажуулалтад хамруулсан аж.

Коронавирусийн эсрэг вакцинжуулалт эхэлснээс хойш хугацаанд нийслэлийн 18-аас дээш насны 1.035.906 иргэн I тунд, 894.501 иргэн II тунд хамрагдаад байгаа талаар албаныхан мэдээллээ. Түүнчлэн жирэмсэн эхчүүдийн 22.6 хувь буюу 2672 нь вакцины нэгдүгээр тундаа хамрагдаад байна. Мөн нийт 12-15 насны 30133 (29.7 хувь), 16-17 насны 17739 (49.5 хувь) хүүхэд тус тус дархлаажуулалтад хамрагдаж, вакцины I тун хийлгэжээ.

Харин өнөөдөр буюу долдугаар сарын 6-нд Улаанбаатар хотод суурин 28 цэгт 44 багийн 314 эмч, ажилтан ажиллаж, 16574 иргэнийг дархлаажуулахаар төлөвлөсөн байна.