Гэрээний үүргээ биелүүлсэн хэмээх үндэслэлээр БЗС-гаас авсан зээлээ тэглүүлсэн зээлдэгчдийн нэрс болон чөлөөлөхөөр шийдвэрлэсэн тухайн үеийн сайд нарын тушаал ил болоод буй.

Тухайлбал, Ерөнхийлөгч У.Хүрэлсүхийн соёл, шашны бодлогын зөвлөх Д.Бум-Очир Английн Кембрижийн их сургуульд нийгэм соёлын антропологийн чиглэлээр докторт суралцахдаа БЗС-гаас 48 мянган ам.доллар буюу одоогийн ханшаар 165 сая төгрөгтэй дүйцэхүйц хэмжээний зээл авсан байдаг. Харин үүнийг нь 2013 оны "Зарим хүмүүсийн гэрээний биелэлтийг тооцон дуусгавар болгох тухай" БСШУ-ны сайдын А185 тоот тушаалын дагуу чөлөөлжээ. Ингэхдээ гадаадад их дээд сургуулиа төгсөж ирээд гэрээний дагуу Монгол Улсад 5 болон түүнээс дээш жил үр бүтээлтэй ажилласан хэмээх үндэслэлээр зээлийг нь ийнхүү тэглэсэн аж. Тухайн үед Д.Бум-Очир нь МУИС-ийн НШУС-д багш, ШУА түүхийн хүрээлэнд эрдэм шинжилгээний ажилтан хийж байжээ.

Харин түүний зээлийг тэглэх тушаал гарсан өдөр буюу 2013 оны тавдугаар сарын 22-ны өдрийн ам.долларын ханшаар тооцож үзвэл, Д.Бум-Очирын 69 сая төгрөгтэй дүйцэх зээлийг тэглэсэн гэсэн үг юм.