УИХ-ын дарга Г.Занданшатар, УИХ-ын гишүүдийн хамтаар Төрийн албан хаагчийн ёс зүйн тухай хуулийн төсөл болон хамт өргөн мэдүүлсэн хууль, тогтоолын төслүүдийн талаар мэдээлэл өглөө.

УИХ-ын дарга Г.Занданшатар "Төрийн албан хаагчийн ёсзүйн тухай хуулийг анх 2018 онд олон улсын туршлагыг тусгаж боловсруулах ажлын хэсгийг байгуулсан байдаг. Үүнээс хойш 5 жил өнгөрсөн байна. Ажлын хэсэг Япон улсын төрийн албаны ёсзүйн тухай хууль, Герман улсын сахилга хариуцлагын тухай хууль, Канад болон Европын улсуудын төрийн албаны ёсзүйн код, стандартуудыг нарийвчлан судалж, энэ хуулийн төслийг боловсруулсан.

Улмаар 2019 оны хоёрдугаар сарын 1-нд ХЗДХЯ-ны санал дэмжигдэж, УИХ дээр ажлын хэсэг байгуулж ажилласан.

Энэ хуулийн анхны хэлэлцүүлгийг маргааш хийнэ. Энэ хуулийг боловсруулах шаардлага нэгдүгээрт, Нэг тогтолцооноос нөгөө тогтолцоо руу шилжих шилжилтийн үед стандартын хэм хэмжээ өөрчлөгддөг. Гэтэл шинэ стандарт бий болоогүй удсан. Тиймээс төрийн албанд ёсзүйг хуульчилж байж, хууль зүйн амин сүнс уг үндэс тогтох юм байна гэж үзсэн. Өөрөөр хэлбэл, ёсзүйг хэм хэмжээ болгож хуульчилж байж, хууль хэрэгжих үндэс болно. Хуулийн үндэс нь ёс суртахуун, ёсзүй гэж үздэг. Энэ бол төрийн албан хаагчдын нэр хүндийг өсгөх асуудал.

Ганц хоёр үл бүтэх этгээдээс болж, монгол төрийн албан хаагчдын нэр хүнд бүхэлдээ унадаг. Тиймээс төрийн албан хаагчдаа хамгаалах хууль юм.

Монгол Улсын хэмжээнд 4232 төрийн байгууллага ажиллаж байна. Энэ байгууллагуудад төрийн албаны ёсзүйн зөвлөл ажиллах ёстой. Одоогийн байдлаар 2691 төрийн албаны ёсзүйн зөвлөл байгуулагдаад ажиллаж байна. Гэхдээ нэгдсэн удирдлага стандарт, мэргэжил арга зүйн зөвлөгөө удирдамж байхгүй учир танил тал, дур зоргоороо хэдэн хүн томилогдоод өөр өөр шийдвэр гаргаад явж байна.

Ажлын байранд архидан согтуурах 91 зөрчил гарсан байна.