НҮБ-ын Аюулгүйн зөвлөлийн хуралдаан дээр АНУ-ын Төрийн нарийн бичгийн дарга Антони Блинкен бусад дипломатчдад "Бидний бий болгосон олон улсын дэг журам нүдний өмнө нуран унаж байна” хэмээн хэлэх үед ОХУ-ын Гадаад хэргийн сайд танхимд байгаагүй аж.

Тэрбээр пүрэв гаригт болсон НҮБ-ын Ерөнхий Ассамблейн дээд түвшний уулзалтын үеэр "Ерөнхийлөгч Путин үүнээс зугтахыг бид зөвшөөрч болохгүй - зөвшөөрөхгүй" хэмээсэн байна. Тус уулзалт Москвагийн зүгээс хэдэн зуун мянган цэргийг дайчлах тушаал, Украины Орост эзлэгдсэн хэсгүүдэд “хуурамч санал асуулга” явуулах зэрэг хурцадмал үйл ажиллагаа явуулж байсан долоо хоногт болсон юм.

Блинкен хэлэхдээ "Ерөнхийлөгч Путин НҮБ-ын уулзалт болж, дэлхийн улс орны төлөөллүүд цугларсан энэ үеийг сонгосон нь гал дээр тос нэмж, НҮБ-ын дүрэм, Ерөнхий Ассамблей, Аюулгүйн зөвлөлийг үл тоомсорлож буйг харуулж байна" гэжээ.

ОХУ-ын Гадаад хэргийн сайд Сергей Лавров төлөөллөө танхимд үлдээн, өөрөө эзгүй байсан бөгөөд олон улсын нийтээр Оросыг буруушааж буйг эсэргүүцэж байсан юм. Албаны зарим хүмүүс түүнийг буруутгал сонсохыг хүсээгүй тул өрөөнөөс гарсан хэмээн таамаглаж байна.

АНУ-ын Төрийн департаментын нэгэн ахлах мэргэжилтэн сэтгүүлчдэд хэлэхдээ, уулзалтын үеэр "Орос улс дэлхийн үзэл бодлын халуун амьсгалыг үнэхээр мэдэрсэн. Аюулгүйн зөвлөлийн танхимд БНХАУ-ын Гадаад хэргийн сайд Ван И-ээс эхлээд Тони Блинкен хүртэл Владимир Путин, Лавровыг жаахан ч гэсэн тайтгаруулсан зүйл хэлээгүй болов уу. Бүгд л энэ дайн дуусах ёстой гэж хэлсэн” хэмээсэн байна.

Блинкен болон НҮБ-ын Ерөнхий нарийн бичгийн дарга Антонио Гутерриш зэрэг бусад албаныхан Украинд болж буй харгислал, дайны нөлөөнд үүсэж буй хүнсний аюулгүй байдал нөлөөг онцлон тэмдэглээд, Оросыг цөмийн зэвсгийн цохилтоо зогсоохыг уриаллаа.

“Ерөнхийлөгч Путин сонголтоо хийж байна. Одоо бүх улс орон өөрсдийнхөө сонголтыг хийх ёстой. Ерөнхийлөгч Путинд эхлүүлсэн аймшгаа зогсоохыг уриалцгаа. Өөрийн эрх ашгийг дэлхийн бусад улсын, тэр дундаа ард түмнийхээ эрх ашгаас дээгүүр тавихаа зогсоо гэж хэлцгээ. Түүнд энэ Аюулгүйн зөвлөлийг болон түүний үйл ажиллагаа зэрэг зүйлсийг гутаан доромжлохоо зогсоох ёстойг нь хэлцгээ" хэмээн Блинкен хэлжээ. Мөн тэрбээр “Нэг хүн энэ дайныг сонгосон. Нэг хүн үүнийг дуусгаж чадна. Учир нь Орос дайнаа зогсоовол дайн дуусна. Хэрэв Украйн дайнаа зогсоовол Украин дуусна" гэсэн байна.