Хөвсгөл аймгийн Мөрөн хотноо үйл ажиллагаа явуулдаг “Бэлтэс мөрөн” ХХК нь ахмад настан болон хөгжлийн бэрхшээлтэй иргэдийн тэтгэвэр, тэтгэмжийн мөнгийг авч, эргүүлэн өгөхдөө их хэмжээгээр нэмэгдүүлэн өгч буй мэдээлэл гарсан. Үүнтэй холбогдуулан тус компанийн үйл ажиллагааг шалгахыг Санхүүгийн зохицуулах хорооноос Хөвсгөл аймгийн ЗДТГ болон Цагдаагийн байгууллагад мэдэгдсэн байдаг. Ингэхдээ мөнгө угаах гэмт хэрэг үйлдэж байж болзошгүй гэдгийг сануулсан.
Гэвч тус компани нь үйл ажиллагаагаа өнөөдрийг хүртэл явуулсаар байгаа талаар "Хөвсгөл" телевиз шууд дамжуулсан юм. Мэдээлэлд дурьдсанаар, тус компани нь эхний удаад иргэдээс дээд тал нь 10 хүртэлх сая төгрөгийг бэлнээр авч, хүүг нь 100 хувь буцаан олгож байсан бол өнөөдрөөс эхлэн хүүг нь 30 хувиар буцаан олгоно хэмээн мэдээлснээс ахмад настан хөгжлийн бэрхшээлтэй иргэд тус газрын гадна зодоон цохион, үймээн самуун үүсгэж буй аж.
