УИХ-ын чуулганы хуралдаан үргэлжилж байна. АН-ын зүгээс Төсвийн тухай хуулийн хэлэлцүүлгээс 14.00 цаг хүртэл завсарлага авсан юм. Завсарлагын хугацаа дууссантай холбогдуулан УИХ дахь АН-ын бүлгийн дарга Д.Ганбат үг хэлснээр Төсвийн тухай хуулийг хэлэлцэж эхэллээ.
УИХ-ын гишүүн Д.Ганбат "Төсөв хуулийн хугацаатайг ойлгож байгаа. Богино хугацаанд олон ажил амжууллаа. Олонхын бүлгийн дарга Д.Тогтохсүрэнтэй санал солилцлоо. АН-ын бүлгийн гишүүд рүү гаднаас олон хүн ярьж байна. Эдийн засгийн нөхцөл байдалтай холбогдуулан ажлын хэсэг гаргах санал гаргаж байна" гэв.
УИХ-ын дарга Г.Занданшатар "Эдийн засгийг сэргээх зорилгоор ажлын хэсэг байгуулахыг МАН-ын бүлгийн дарга Д.Тогтохсүрэн ч мөн гаргасан. Тиймээс хоёр талаас ажлын хэсэгт орох гишүүдийн нэрсээ тогтоод ажлын хэсэг гаргаж болно" гэлээ.
