Улсын онцгой комиссоос тавдугаар сарын 22-ноос зарим үйлчилгээний газруудыг нээхтэй холбогдуулан мэдээлэл хийж байна.

Засгийн газрын Хэвлэл мэдээлэл, олон нийттэй харилцах газрын дарга Ц.Ганзориг:

1. “Орон нутаг руу тавдугаар сарын 22-ноос эхлээд давтан тун хийлгээд 14 хоносон иргэд тургавчилсэн болон PCR шинжилгээ өгөлгүй цахим болон цаасаар хэвлэсэн вакцин хийлгэсэн бичгээ үзүүлээд зорчих боломжтой. Ингэхдээ 0-17 насны хүүхэдтэйгээ хамт явж байгаа тохиолдолд хүүхдүүдээс шинжилгээ өгөхийг шаардахгүй.
2. Иргэд олноор үйлчлүүлдэг “Нарантуул”, “Хархорин”, “Шинэ сандэй”, “Сандэй плаза”, “Шөнийн зах”, “Дүнжингарав” зэрэг барааны худалдааны төвүүд, “Бөмбөгөр”, “Содон бөмбөгөр”, “Алтжин бөмбөгөр” зэрэг худалдааны төвүүд нээгдэнэ.
3. Сүлжээ хоолны газрууд болон кафе, ресторан зэрэг үйлчилгээний газрууд павтан тун хийлгээд 14 хоносон хүмүүст 50 хувийн заалны дүүргэлттэйгээр үйлчлэх боломжтой.
4. Зочид буудлууд тавдугаар сарын 22-ноос үйл ажиллагаагаа эхлүүлнэ.
5. Амралт жуулчны газрууд мөн адил давтан тунд хамрагдсан хүмүүст үйлчилнэ.
6. Саун бассейны газрууд давтан тун хийлгэсэн иргэдэд үйлчлэх болно.

Ийнхүү тавдугаар сарын 22-нд үйлчилгээний газрууд нээгдэхэд нийт 87 хувийн аж ахуйн нэгжүүд үйл ажиллагаагаа нээж байна. Хэдий энэхүү бизнесийн байгууллагуудад халдвар тархах эрсдэлтэй гэж үзсэн ч Засгийн газраас бүрэн тун хийлгээд 14 хоносон иргэдэд нээлттэй үйлчлэх боломжоор хангаж байна. Цаашид үзвэр үйлчилгээ, цэнгээний газруудад эрсдлийн үнэлгээ хийсний үндсэнд нээх болно” гэлээ.