Үндэсний агаарын тээвэрлэгч МИАТ компани ӨАБНУ-ын Йоханнесбург хот руу захиалгат нислэг үйлдлээ. Оюутолгой компанийн захиалгаар үйлдсэн энэ нислэг очихдоо 24 цаг 2 минут, буцахдаа 22 цаг 27 минут үргэлжилж, өнгөрсөн бямба гарагийн /2021.04.24/ 18.44 цагт “Буян-Ухаа” нисэх буудалд амжилттай газарджээ. 

Нислэгээр агаарын хөлгийн нисэх бүрэлдэхүүнийг оруулаад нийт 59 зорчигчийг тээвэрлэн ирсэн байна. Энэ нь МИАТ компани таван тивд хүрсэн түүхэн нислэг болсныг тус компаниас онцлон мэдээлэв. Нислэгийн үед УОК-оос гаргасан халдвар хамгааллын дэглэмийг баримтлан ажилласан байна.