УИХ-ын өнөөдрийн чуулганы нэгдсэн хуралдаанаар Төрийн болон орон нутгийн өмчит компанийн бүтээмж, ил тод байдал, засаглалыг сайжруулах тухай хуулийн төсөл болон хамт өргөн мэдүүлсэн хууль, тогтоолын төслүүдийг хэлэлцэх эсэх асуудлыг дэмжсэн билээ.
Энэ үеэр УИХ-ын гишүүн Д.Батбаяр: Хуулийн төслийг агуулгаар нь дэмжиж байна. Төрийн өмчийн 122 ААН 4.8 их наяд төгрөгийн орлоготой ажиллаж байгаа юм байж. Нөгөө талд төр өөрөө бизнес хийх шаардлагагүй буюу үндсэн чиг үүргийнхээ дагуу ажиллая гэдэг зүйлийг харуулсан ашиггүй ТӨК-иудын асуудал ч харагдаж байна. Өнгөрсөн жил гэхэд 150 тэрбумын алдагдалтай 43 ТӨК байсан байна. Энэ хуультайгаа хамт хувийн хэвшил, бизнес эрхлэгчид менежментийн хувьд аваад явах бүрэн боломжтой компаниудыг хувьчлах бодлогоо хамтад нь боловсруулаад ороод ирэх боломж байсан шүү.
