Даваа гариг бүр УИХ дахь намын бүлгүүд хуралддаг. Энэ дагуу өнөөдөр МАН бүлэг ээлжит хурлаа хийлээ. УИХ дахь МАН-ын бүлгийн дарга Д.Тогтохсүрэн хуралдаанаас гарсан шийдвэрийг танилцууллаа.

Тэрбээр, "Засгийн газар энэ удаагийн төсвийн тодотголоор хөрөнгө оруулалтаас 520 орчим тэрбум төгрөгийг хасна гэж тооцсон байна. 2022 оны шинэ хөрөнгө оруулалт нийтдээ 1 их наяд төгрөг байгаа. Тэгэхээр энэ оны хөрөнгө оруулалтын тал хувь хасагдаж байгаа. Хэмнэлтийн горимын хүрээнд импортыг багасгавал ханшаа барьж чадна гэж үзэж байна. Тиймээс Засгийн газраас оруулж ирж буй төслийг дэмжиж байна.

Мөн яамдтай холбоотойгоор урсгал зардлыг танах ёстой гэсэн асуудал гарч ирж байна. Энд ялгавартай хандах ёстой гэдэгтэй санал нэг байна" гэв.