Дүүжин тээвэртэй холбоотой асуудлаар Нийслэлийн засаг даргын орлогч Б.Одсүрэн мэдээлэл өглөө. Тэрбээр "Засгийн газрын хэмжээнд ажлын хэсэг байгуулагдаж, гурван удаа хуралдсан. Дүүжин тээврийн эхний чиглэл буюу Баянхошуу-3-4р хорооллын эцэс хүртэлх шугам нь газар өмчлөлтэй айлуудын хажуугаар явж байгаа учраас иргэд өөрийнхөө өмчилсөн газар дээр барилга, байшин барина гэх байдлаар эсэргүүцэлтэй тулгарч байгаа учраас эхний чиглэлийг өөрчлөх ажлын хэсгийн шийдвэр гарсан. Дүүжин тээвэр нь хоёр улсын Засгийн газрын хэмжээнд нэн хөнгөлөлттэй зээлийн хүрээнд хэрэгжүүлж байгаа төсөл. Энэ төслийн үр өгөөжийг дээшлүүлэхийн тулд хаана, яаж оновчтой тавих вэ гэдгээ байршлын маршрутыг солих ажиллагаа явагдаж байгаа" гэв.