“Токио 2020” зуны XXXII олимпын наадмын чөлөөт бөхийн эмэгтэйчүүдийн 53 кг жингийн хүрэл медалийн төлөөх барилдаанд Б.Болортуяа барилдаж, Камеруны бөх Жосеф Эссомбег 14:4 харьцаагаар ялж, хүрэл медалийн эзэн болсон. Түүний нөхөр Л.Батбаярын сэтгэгдлийг сонслоо.

-Юуны өмнө танд баяр хүргэе. Эхнэр нь дөнгөж сая олимпын хүрэл медальтан боллоо. Сэтгэгдэл ямар байна?

-Баярлалаа. Сэтгэгдэл маш өндөр байна. Хэлэх ч үг олдохгүй. Ганцаараа орилоод байж байна. Манай гэр бүлийнхэн, аав ээж маань бүгдээрээ хамтдаа тэмцээнийг нь үзлээ. Бүгдийг нь явуулчихаад ганцаараа орилоод л сэтгэлээ нээлээ.

-Яг олимпын хүрэл медаль хүртэх мөчид юу бодогдов?

-Эхнэрээ медаль авна гэдэгт бат итгэлтэй байсан. Сэтгэл зүрх догдлоод, сэтгэл хөдлөл хамгийн өндөр цэгтээ оччихсон байна.

-Тамирчин Б.Болортуяагийн сэтгэл зүй ямар байсан бэ. Өөртөө хэр итгэлтэй байсан бэ?

-Манай хүн угаасаа өөртөө үнэхээр итгэлтэй байсан. Сэтгэлзүй өндөр хүн. Би медаль авна. Хожно гээд явсан.

-Б.Болортуяа чөлөөтөөр хэдэн жил барилдаж байгаа вэ?

-11 жилийн турш барилдаад энэ амжилтад хүрч байгаад маш их баяртай байна.