Энэ Европын аваргын хамгийн хүчтэй бүрэлдэхүүнтэй шигшээ багуудын нэгээр зүй ёсоор тооцогдож байсан Английн шигшээ шөвгийн наймын тоглолтоо Украины эсрэг хийж, 4:0-ээр хөнгөхөн хожлоо. Энэ тоглолтод Харри Кейн дубль хийсэн бол Харри Магуэйр, Жордан Хендерсон нар нэг нэгийг нэмсэн. Тэгвэл тоглолттой холбоотой статистик мэдээллүүдийг хүргэе.
-Харри Кейн Европын аварга шалгаруулах тэмцээний хасагдах шатны тоглолтуудад хоёр тоглолт дараалан гоолдсон анхны англи хөлбөмбөгч боллоо. Шөвгийн 16-д Германы эсрэг нэгийг, шөвгийн наймд Украины хаалганд хоёрыг орууллаа.
-Дахиад л Харри Кейний статистик. Тэрбээр Укрианы хаалганд 4 болон 50 дахь минутад гоол оруулсан. Ингэснээр Европын аваргад 3 дахь гоолоо оруулж, Стерлингийн хамтаар багийнхаа мэргэн буучийн жагсаалтыг тэргүүлж байна. Хамгийн гол нь тэрбээр Дэлхийн аварга болон Европын аварга шалгаруулах тэмцээнд 9 дэх гоолоо оруулж, Уэйн Рүүнигээс тасарч, Алан Ширертэй зэрэгцлээ. Одоо түүний өмнө 10 гоолтой Гари Линекер л байна.
-"Ливерпүүл" клубын ахлагч Жордан Хендерсон шигшээ багийнхаа төлөө 62 тоглолт хийсний эцэст анхны гоолоо орууллаа.
-Английн шигшээ баг 1966 оны дэлхийн аварга шалгаруулах тэмцээнээс хойш томоохон тэмцээнд анх удаагаа хасагдах шатанд 4 гоол оруулж байгаа нь энэ ажээ. Тухайн үед Англи дэлхийн аварга болж байсан. Харин 2004 оны Европын аваргын хэсгийн тоглолтын үеэр Хорватыг 4:2-оор хожиж байжээ.
-Английн шигшээ баг энэ удаагийн Европын аваргад 5 тоглолт хийхдээ гоол алдаагүй байна. Хэсгийн шатанд Хорват, Чехийг 1:0-ээр хожиж, Шотландтай хуурай тэнцсэн. Улмаар шөвгийн 16-д Германыг 2:0, шөвгийн наймд Укрианыг 4:0-ээр хожлоо. Энэ Европын аваргын түүхэнд байгаагүй рекорд амжилт ажээ. Английн шигшээ бүх тэмцээнд сүүлийн 10 тоглолтдоо ердөө ганцхан гоол алдсан байна.
-Английн шигшээ баг 1996 оны Европын аваргаас хойш энэ тэмцээнд хагас шигшээд анх удаа очиж байна. Тухайн үед хагас шигшээд Германд хожигдож байжээ.
-Английн шигшээ Европын аваргын түүхэнд хасагдах шатанд ердөө 3 удаа л үндсэн цагт хожиж байгаа аж. Түүний хоёр нь энэ удаагийн тэмцээнд тохиож байгаа. Энэ хүртэл 9 удаа Европын аваргад оролцсон. 1980, 1988, 1992, 2000 онуудад хэсгээсээ гарч чадаагүй. 2004, 2012, 2016 шөвгийн 16-д хожигдсон. Евро-68-д тэд мөн хасагдах шатны эхний тоглолтдоо хожигдсон. Гэхдээ хасагдах шатанд ердөө 4 баг л үлдэж тоглосон учраас хүрэл медалийн төлөө Зөвлөлийн багийг 2:0-ээр хожсон. 1996 онд Английн шигшээ Испанийг торгуулийн цохилтоор хожиж, хагас шигшээд шалгарсан ч Германд хожигдсон.
-Укрианы эсрэг Харри Кейн, Харри Магуэйр, Жордан Хендерсон нар мөргөж гоолдсон. Тэгвэл Европын аваргын түүхэнд нэг тоглолтод гурван удаа мөргөж гоолдсон анхны баг болжээ, Англи. Өмнө нь 2016 оны ДАШТ-ий урьдчилсан шатанд Шотландын эсрэг тоглохдоо Английн шигшээгийнхэн 3 гоолыг толгойгоороо оруулж байсан аж.
-"Манчестер Юнайтед"-ын жигүүрийн хамгаалагч Люк Шоу энэ удаагийн Европын аваргад 3 гоолын дамжуулалт өгөөд байна. Ийм амжилтыг Английн багаас өмнө нь 2000 оны Европын аваргаар Дэвид Бекхэм үзүүлж байжээ.
-Гарет Саутгейтийн баг 7 тоглолт дараалан хаалгандаа гоол алдаагүй байна. Европын аварга 5 тоглолтод гоол алдаагүй. Мөн энэ тэмцээний өмнө Австри, Румыны шигшээ багуудыг тус бүр 1:0-ээр хожсон. Үндсэндээ тэд 662 минутын турш хаалгандаа гоол алдаагүй байгаа аж.
-Английн шигшээ сүүлийн 11 тоглолтдоо хожигдоогүй байна. 10 хожиж, 1 тэнцсэн. Энэ хугацаанд 23 гоол оруулж, 1-ийг л алдсан аж. Хамгийн сүүлд Англичууд 2020 оны 11-р сард Бельгитэй хийсэн тоглолтод 2:0-ээр хожигдсон.
