УИХ-ын гишүүн М эхнэрээ зодсон гэх мэдээлэл цагдаагийн байгууллагад бүртгэгдсэн талаар бид мэдээлсэн. Тодруулбал, Хан-Уул дүүргийн цагдаагийн хоёрдугаар хэлтэст УИХ-ын гишүүн М эхнэрээ зодсон гэх дуудлага ирж, хэргийг тус цагдаагийн газар шалгаж эхэлсэн байдаг. Хэдийгээр энэ талаарх дуудлага Хан-Уул дүүргийн цагдаагийн хэлтэст бүртгэгдсэн ч ЦЕГ-ын Хэвлэл мэдээллийн төвөөс мэдээлэл өгөхөөс татгалзаж, энэ асуултад хариулт өгөхгүй хэвээр байгаа юм.
Тэгвэл Ж.Мөнхбатын эхнэр Б-гийн ээж Д.Цэцгээ гэх эмэгтэй өөрийн цахим хуудаснаа "УИХ-ын гишүүн Жамъянгийн Мөнхбат эхнэр, гурван нялх хүүхдийнх нь ээж, миний амин хайртай охин Б-г удаа дараа зоддог нь үнэн боллоо. Охин минь гурван хүүхдээ бодоод аав, ээж, ах, эгч, нартаа ч хэлээгүй шаналж явсанд нь би мэдээгүй явсандаа харамсаад баршгүй. Хаалгаа цөм өшиглөж эвдсэн, одоо ч хаалганууд нь эвдэрхий хэвээрээ байгаа. Одоо би эцсийн амьсгалаа хураатал тэмцэн, өмгөөлж хамгаална Хайртай шүү охиндоо" хэмээн бичжээ.
УИХ-ын гишүүн Ж.Мөнхбат энэхүү мэдээллээ нуун дарагдуулахын тулд ихээхэн хичээж байгаа гэх мэдээлэл ч үнэний ортой бололтой. Хэвлэлд мэдээллээ нээлттэй өгөх ёстой Цагдаагийн хэвлэл мэдээллийн төв бусад асуудалд хамгийн түрүүнд гарч ирээд мэдээлэл өгдөг хэрнээ эрхэм гишүүний асуудлаар мэдээлэл өгөхөөс татгалзаж, зугтсаар байна.
