Менингококкт халдвар буюу цахилгаан менингит өвчний улмаас өчигдөр нэг хүүхэд нас баржээ. Тодруулбал, Ховд аймагт 6 настай хүүхэд нас барсан байна.

ХӨСҮТ-ийн хамгийн сүүлд өгсөн албан ёсны мэдээллээр Монгол Улсын хэмжээнд 2026 оны 3 дугаар сарын 05-ны өдрийн байдлаар менингококкт халдварын батлагдсан 5 тохиолдол (УБ-2, ДА-1, ХО-1, УВ-1), сэжигтэй 1 (УБ) тохиолдол бүртгэгдэж, 1 тохиолдол нас барсан байна. /Үүн дээр өчигдөр нас барсан тохиолдол болон энэ сарын 5-наас хойш бүртгэгдсэн тохиолдлын тоо нэмэгдэнэ/.

Насны хувьд 6 сартайгаас 10 насны хүүхдийн дунд бүртгэгдэж, 66,7 хувь нь 5 хүртэлх насны хүүхдүүд байна.

Хаврын улиралд менингококкт халдварын эрсдэлтэй улирал бөгөөд цаашид ч тохиолдлын тоо нэмэгдэх хандлагатай байна. Сүүлийн 6 жилийн өвчлөлийн хөдлөл зүйгээс харахад нийт өвчлөлийн 56 хүртэлх хувь нь Улаанбаатар хотод бүртгэгдэж, Увс, Дорнод, Завхан, Дархан-Уул, Баян-Өлгий, Орхон, Хөвсгөл, Өвөрхангай, Сэлэнгэ, Төв аймгуудад өвчлөлийн түвшин бусад аймаг, орон нутагтай харьцуулахад өндөр байна. Дүүргийн хувьд НА, ЧД, БЗД, СХД өндөр байна. Өвчлөл 12 дугаар сараас 6 дугаар саруудад өндөр, нийт өвчлөлийн 80-90 орчим хувь нь эхний 6 сард бүртгэгдсэн байна.

Хэрвээ та хүсвэл ХӨСҮТ-ийн дархлаажуулалтын кабинетээр сайн дураар вакцинд хамрагдах боломжтой.