УИХ-ын чуулганы нэгдсэн хуралдааны өнөөдөр /2025.05.30/-ийн үдээс хойшхи хуралдаанаар гурван асуудал хэлэлцлээ.

Боловсролын санхүүжилт, хөрөнгө оруулалтыг нэмэгдүүлж, хүүхэд бүрд суралцах тэгш боломжийг бүрдүүлэх чиглэлээр авч хэрэгжүүлж байгаа үйл ажиллагааны талаархи Ерөнхий сайдын мэдээллийг сонсож хэлэлцлээ.

Сүүлийн жилүүдэд боловсролын санхүүжилт тогтвортой нэмэгдсэн байна. Тухайлбал, боловсролын салбарт гүйцэтгэлд суурилсан санхүүжилтийг нэвтрүүлж төсвийн хэмжээг 2021 онтой харьцуулахад 2.5 дахин нэмэгдүүлсэн байна. Боловсролын төсвийн улсын төсвийн тэнцвэржүүлсэн орлогод эзлэх хувь өсөж, 2021 онд 18 хувь байсан бол 2025 онд 19.6 хувь болсон байна. Цэцэрлэг, сургуулийн хувьсах зардлын хэмжээг 2021 онтой харьцуулахад цэцэрлэгт дунджаар 36.4, ерөнхий боловсролд 51.6 хувиар тус тус нэмэгдүүлсэн байна.

2025 онд нийт 60 цэцэрлэг, 85 сургууль, 16 дотуур байрны хөрөнгө оруулалтыг төсөвт тусгаж, ондоо багтаж 390 хүүхдийн ортой хоёр цэцэрлэг, 4840 суудалтай 14 сургууль ашиглалтад оруулахаар ажиллаж байгаа юм байна. Хэдийгээр жил бүр цэцэрлэг, сургуулийн суудлын тоог нэмэгдүүлж байгаа ч хүүхдийн тооны өсөлттэй нийцэж чадахгүй байна. Иймд 2025 оны хичээлийн жилээс зарим богино хугацаанд үр дүн гарах боломжтой арга хэмжээг хэрэгжүүлж эхлээд байна.

Мөн 2025 оны есдүгээр сараас Улаанбаатар хотын анги дүүргэлт ихтэй Баянгол, Хан-Уул, Баянзүрх дүүргийн зарим байршлын томоохон хороолол, хотхонуудад бага сургууль байгуулж ажиллахаар төлөвлөснийг танилцууллаа. Сайдын мэдээлэлтэй холбогдуулж иргэдээс 22 асуулт ирүүлснийг сайдаас асууж хариулт авлаа. Тодруулбал, багш нарын цалин бага байгаагаас орон сууцанд орох боломж хомс байдаг. Иймд хүү багатай орон сууцаар хангах боломжийг бүрдүүлж өгөхийг хүссэн байна. Мөн цэцэрлэгийн багш нар хүнд нөхцөлд ажиллаж байгаагаас 50 настай тэтгэвэрт гарах боломж байгааг асуулаа. Мөн анги удирдсан багш нарын нэмэгдлийг хүүхдийн тоотой уялдуулж олгох зэргийг асуулгалаа.

Агаарын бохирдол, утааны асуудлаар ерөнхий хяналтын сонсголын бэлтгэлийг хангах, зохион байгуулах үүрэг бүхий ажлын хэсгийн тайланг хэлэлцсэн талаарх Байгаль орчин, хүнс, хөдөө аж ахуйн байнгын хорооны санал, дүгнэлтийг хэлэлцлээ.

УИХ-ын гишүүд утааны асуудал Улаанбаатар хотын асуудал биш орон нутагт мөн ихсэж байгааг анхаарч, яаралтай арга хэмжээ авахыг онцоллоо. Агаарын бохирдлыг бууруулахын тулд зуухны шинэчлэл, түлшний стандартыг сайжруулах, дулаалгыг сайжруулснаар агаарын бохирдол буурч, эрчим хүчний зарцуулалтыг 60 хэмнэнэ гэж ажлын хэсэг үзсэн байна.

Агаарын бохирдол, утааны ерөнхий хяналтын сонсголын ажлын хэсгийн санал дүгнэлтийн хүрээнд Засгийн газарт чиглэл өгөх тухай УИХ-ын тогтоолын төслийг хэлэлцлээ.