УИХ-ын чуулганы хуралдаанаар АТГ-ын даргыг томилох тухай асуудлыг хэлэлцэж байна. Авилгын эсрэг хуульд заасны дагуу АТГ-ын даргыг 6 жилээр УИХ-аас томилдог ба нэг удаа сунгаж болох зохицуулалттай аж. Энэ удаагийн томилгоо нь АТГ-ын даргыг улираан томилж буй анхны тохиолдол бөгөөд З.Дашдаваа нь өнгөрсөн хугацаанд авилгын улмаас учирсан хохирлыг нөхөн төлүүлэхэд онцгой үр дүнтэй ажилласан гэж үзжээ. Тухайлбал 2020 оноос хойш гадаад улсаас 13.9 сая ам.долларын хөрөнгийг Монгол Улсад оруулж ирсэн.

2024 онд авилгын гэмт хэргийн улмаас улсад учирсан 417 тэрбум төгрөгийн хохирлоос 240.9 тэрбум буюу 57.7 хувийг нөхөн төлүүлсэн байна. Хахуулийн 50.2 тэрбум төгрөгийн үнэ бүхий хөдлөх, үл хөдлөх хөрөнгө, бэлэн мөнгө, хураан авсан.

Манай Улсын авилгын индекс 121-р байрт орсон таагүй үзүүлэлтийг АТГ-тай холбож тайлбарлах нь бий. Тэгвэл авилгын төсөөллийн индексийг гаргагч олон улсын байгууллагаас хууль эрх зүйн тогтолцоо, улс төр дэх авлига, шүүхийн хараат бус байдал зэрэг нь авилгын төсөөллөөр ухрах гол үндэслэл болсныг онцолдог ажээ. Монгол Улсын АТГ нь Зүүн Европ, төв Азийн Авлигын эсрэг сүлжээнээс Истанбулын Авлигатай тэмцэх 5-р төлөвлөгөөний олон улсын мониторингод хамрагдаж тайлангаа амжилттай хамгаалсан байна. Түүнчлэн meduuleg.iaac.mn, iad.iaac.mn; e-office, smart.iaac.mn, search.iaac.mn, xasxom.iaac.mn гэх цахим системүүдийг интеграцичилж, хөрөнгө орлогын мэдүүлгийг хянах, өргөдөл гомдол хүлээн авах ажиллагааг ухаалгаар удирддаг болсон зэрэг үйл ажиллагааны процессийн түвшинд олон дэвшлүүд гаргсан байна.

Түүнийг АТГ-ыг удирдах хугацаанд ЖДҮ, Нүүрсний, хөгжлийн банкны гэх тодотголтой хэргүүдэд төр засгийн өндөр дээд албан тушаалтнууд холбогдон шалгагдсан бөгөөд УИХ-ын гишүүн 8, Засгийн газрын гишүүн 2, ЕТГ-ын дарга 1 хүний хэрэг шүүхээр шийдвэрлэгдсэн нь АТГ хараат бус өндөр албан тушаалтнуудын гэмт хэргийг шалган шийдвэрлэсэн онцгой үзүүлэлт юм.

Мөн ногоон автобусны гэх тодотголтой хэргийн шүүх хуралдаан эд явагдаж байгаа бөгөөд үүнд Засгийн газрын гишүүн, нийслэлийн удирдах дээд албан тушаалтнууд зэрэг төр засгийн өндөр дээд албан тушаалтнуудыг яллагдагчаар татагдаад байгаа билээ. Дээрх үзүүлэлтүүдийг харгалзан үзэж түүнийг АТГ-ын даргаар улираан томилох нь зүйтэй гэж дүгнэжээ.