Сонгинохайрхан дүүргийн 32 дугаар хороо "Авто худалдааны цогцолбор"-ын ойролцоо олон тооны машин шатсан осол гарчээ. Ослын талаар цахим орчинд цацагдсан бичлэгтэй холбоотой Тээврийн цагдаагийн албанаас " Шинэ авто худалдааны төвийн ойролцоо гарсан ослын дуудлагыг бүртгэсэн бөгөөд шалгаж байна" гэлээ.
Одоогоор галын шалтгаан тодорхойгүй байгааг ТЦА-аас мэдээлэв. Тэгвэл энэ талаар онцгой байдлын газраас тодруулахад, СХД-ийн 32-р хороо зам дагуу машин шатаж байна гэсэн дуудлага өнөөдөр 14:40 цагт ирсэн байна. Энэ дагуу дүүргийн Онцгой байдлын хэлтсийн Гал түймэр унтраах, аврах 26 дугаар ангийн алба хаагчдыг очиход 230 орчим боодол өвс ачсан ачааны автомашин бүрэн шатаж байсныг унтраасан байна.
