Ховд аймгийн ИТХ-ын анхдугаар хуралдаанаар Засаг даргад нэр дэвшүүлэх тухай асуудлыг хэлэлцлээ. Монгол ардын намын бүлэг төлөөлөгчөө нэр дэвшүүлээгүй бол Ардчилсан намын бүлэг 22 дугаар тойргоос сонгогдсон төлөөлөгч Морхын Амарсанааг Ховд аймгийн Засаг даргад нэр дэвшүүлсэн юм. Төлөөлөгчид нэр дэвшигчээс асуулт асууж, хариулт авсан ба нээлттэй санал хураав.

Улмаар төлөөлөгчдийн олонхын саналд үндэслэн М.Амарсанааг аймгийн Засаг даргад дэмжиж, Ерөнхий сайдад уламжлахаар боллоо.

М.Амарсанаа нь өдгөө Ховд аймгийн Ардчилсан намын даргаар ажиллаж байна. Тэрбээр аймгийн ИТХ-д гурван удаа сонгогдсон бөгөөд 2012-2016 онд Ховд аймгийн Засаг даргын орлогчоор ажиллаж байсан аж.

Цаашид орон нутгийнхаа үйлдвэр, үйлчилгээний салбар болон бизнес эрхлэгчдийг дэмжинэ. Түүх, соёл, гадаад харилцааны салбарын хөгжлийг шинэ шатанд гаргаж, төсөв, хөрөнгө оруулалтыг ил тод нээлттэй болгоход онцгой анхаарч ажиллахаа илэрхийллээ.