АН-ын 26 гишүүн санаачлан "Хүүхэд хөгжлийн карт"-ын 30 мянган төгрөгийн дэмжлэгийг улсын төсвөөс сар бүр олгодог болох хуулийн төслийг өргөн бариад буй билээ.
Тэгвэл Засгийн газраас 2025 оны төсвийн төслийг УИХ-д өргөн барьсны дараа төлөвлөгөөнд тусаагүй дээрх хуулийн төслийг УИХ-ын зарим гишүүд шүүмжилж буй. Ингэхдээ эдийн засгийн тооцоололгүй, эх үүсвэр нь тодорхойгүй улс төрийн шинжтэй санаачилга гаргасан хэмээн үзэж байгаа юм.
УИХ-ын гишүүн, Гэр бүл, хөдөлмөр, нийгмийн хамгааллын сайд Л.Энх-Амгалан: Эдийн засгийн тооцоолол байхгүй, улс төрийн шинжтэй “популист” санал, санаачилгууд гаргаад тэр нь үндсэндээ орон нутгийн сонгууль руу чиглэсэн үйлдэл болсон гэж харж байгаа. Хэзээ ч бүтэхгүй зүйл шүү дээ. Өнөөдөр улсын төсвөөс хүүхдийн мөнгөнд 1.6 их наяд төгрөг зарцуулж байна. Тэгтэл үүний 1/3-тэй тэнцэх хэмжээний эх үүсвэрийг улсын төсвөөс гаргах ямар ч боломжгүй.
