Өнөөдөр буюу аравдугаар сарын 11-ны өдөр Засгийн газрын ээлжит хуралдаан боллоо. Хууль зүйн сайд Б.Энхбаяр “Эрүүгийн хуульд нэмэлт өөрчлөлт оруулах тухай хуулийн төсөл”-ийг ЗГ-т танилцуулсан. Тэгвэл гарсан шийдвэрийн талаар тайлбар мэдээлэл хийлээ.

Тэрбээр "Согтуугаар тээврийн хэрэгсэл жолоодсон зөрчлийг гэмт хэрэгт тооцно. Ингэхдээ дөрвөн ялын сонголтоор гэмт хэрэгт тооцохоор шийдвэрлэлээ.

Согтуугаар тээврийн хэрэгсэл жолоодвол 1-3 жил хүртэлх хугацаагаар жолоодох эрхийг хасаж, 450 мянгаас 2.7 сая төгрөг хүртэл төгрөгөөр торгох эсхүл 240-720 цаг нийтэд тустай ажил хийлгэх, 6 сараас нэг жил хүртэлх хугацаагаар зорчих эрхийг хязгаарлах эсхүл 6 сараас нэг жил хүртэлх хугацаагаар хорих ял эдлүүлэх өөрчлөлтийг боловсрууллаа.

Мөн ял шийтгэл эдлээд гарч ирсэн этгээд дахин энэ зөрчлөө гаргавал энэ үйлдлийг хүндрүүлэх нөхцөлд тооцож, хорих ялын хэмжээ 2 жил хугацаагаар, торгууль нь нэмэгдэнэ. Зорчих эрхийг нь мөн хоёр жилээр хасна. Хэрвээ энэ үйлдлийг давтан гаргаад байвал ялын бодлого чангарна.

Тээврийн хэрэгслийг согтуурсан мансуурсан үедээ барьж, хүний эрүүл мэндэд хүндэвтэр гэмтэл учруулвал 3-5 жил, хүнд гэмтэл учруулвал 5-8 жил, хүний амь нас хохироовол бүх насаар нь жолоо барих эрхийг нь хасна" гэв.