Мэргэжлийн холимог тулааны оргил UFC холбооны UFC-261 өдөрлөгийн хүрээнд Монгол Улсын тулаанч Д.Батгэрэл АНУ-ын 27 настай тулаанч Кевин Нативидадтай тулалдаж, өрсөлдөгчөө нэгдүгээр үед 50 секундын дотор хүнд цохилтоор буулган авсан. Тэрбээр тулааны дараа хэвлэлийн бага хуралд жингийнхээ аваргуудыг тулаанд дуудлаа.
UFC: Дахиад зүүн гарын цохилтоор нокаут хийсэн. Чиний дуртай цохилт уу?
Д.Батгэрэл: Тийм ээ миний дуртай цохилт. Өмнө нь ч бас энэ цохилтоороо унагааж байсан.
UFC: Бэлдсэн үү? Эсвэл тухайн үед өөрийн мэдрэмжээрээ хөдөлсөн үү?
Д.Батгэрэл: Тухайн үед мэдрэмжээрээ бие өөрөө хөдөлсөн. Гэхдээ өмнө нь бэлдэж байсан.
UFC: Таны дасгалжуулагч Брандон ковид 19 өвчний улмаас ирээгүй. Чи тэмцээнд оролцохдоо энэ тухай бодсон уу?
Д.Батгэрэл: Дасгалжуулагч Жексон бас хамт онгоцонд саатаад ирж чадаагүй. Гэхдээ би энэ талаар огт бодоогүй. Бэлтгэлээ бүрэн хангасан байсан.
UFC: Үзэгчидтэй тулаан хэр санагдаж байв?
Д.Батгэрэл: Үзэгчид байгаа болохоор тэднээс их эрч хүч авч, сайхан тулаан хийлээ.
UFC: Чи хэзээ дахиж тулалдмаар байна? Өрсөлдөгч чинь хэн байгаасай гэж хүсэж байна вэ?
Д.Батгэрэл: Жозе Алдо, Шон O'Мэлли нартай тулалдмаар байна. Жингийнхээ шилдгүүдтэй л өрсөлдөж үзмээр байна. Жозе Алдог өмнө нь аварга болж байсан учир би маш их хүндэлдэг.
UFC: Тамирчид үзэгчгүй тулаан хийж байсан сэтгэгдлээсээ чамд хуваалцаж байсан уу? Чи өмнө нь үзэгчгүй тулаан хийж байгаагүй ч гэсэн ийм тулаанд орж үзэхийг хүсдэг үү?
Д.Батгэрэл: Би үүнээс өмнө үзэгчгүй тулаанд оролцох боломжтой байсан ч цар тахлын улмаас чадаагүй. Яаж ч бодсон үзэгчгүй тэмцээн жаахан онцгүй л байх.
UFC: Чи MMA-ийн тамирчин болсондоо юунд нь баярладаг вэ?
Д.Батгэрэл: Бүх тулааныг нэгтгэсэн спорт учраас маш дуртай. Мөн би Монголын анхны UFC тамирчин учир маш их баярладаг.
UFC: “Mongolian Murder” гэдэг тамирчин өмнө нь байсан. Чи түүнийг таних уу?
Д.Батгэрэл: Тиймээ. Өвөрмонгол тамирчин байдаг. Бид өмнө нь Хятадад хамтдаа тулаанд оролцож байсан.
