Монгол Улсын 2024 оны төсвийн тухай, Нийгмийн даатгалын сангийн 2024 оны төсвийн тухай, Эрүүл мэндийн даатгалын сангийн 2024 оны төсвийн тухай хуулийн төслүүд /Засгийн газар 2023.09.29-ний өдөр өргөн мэдүүлсэн/ өнгөрөгч Мягмар гарагт Төсвийн байнгын хороогоор хэлэлцэж, төсөвт 202 төсөл арга хэмжээг дахин шинээр нэмж санхүүжүүлэх саналын томъёоллыг оруулж ирсэн.

Үүнийг өчигдөр УИХ-аар хэлэлцүүлэхээр оруулж ирсэн бөгөөд тус төсөл арга хэмжээнүүд нь Төрийн Хэмнэлтийн тухай хуулийг зөрчиж байна хэмээн үзэж УИХ-ын дарга Г.Занданшатар санал хураалтыг удирдах боломжгүй хэмээн мэдэгдэж, УИХ-ын дэд дарга Л.Мөнхбаатар хурлыг үргэлжлүүлсэн. Үүнтэй холбоотойгоор Ерөнхий сайд асан С.Баяр "Зөв. Төсвийн хэмнэлтийн тухай хууль зөрчсөн төсөв хэлэлцэж болохгүй гэж. Гэтэл УИХ-ын дарга би үүнийг хэлэлцэхэд оролцохгүй, миний орлогч оролц гэснийг ойлгосонгүй. Би зөрчихгүй, чи зөрч гэж байгаа юм уу. Хурлын дарга илэрсэн дутагдал зөрчлийг арилгаад ир гэж үүрэг өгөх нь түүний үүрэг бус уу. Нутгархаад байсан юмгүй шүү" гэв.