УИХ-ын гишүүн О.Алтангэрэл "Нөмрөгийн дархан цаазат газар гарсан түймрийн буруутанд хариуцлага тооцох" албан бичгийг Ерөнхий сайдад хүргүүлжээ
Дорнод аймгийн Халхгол сумын нутаг дэвсгэр, Нөмрөгийн дархан цаазат газар энэ сарын 8-нд их хэмжээний түймэр гарч тухайн нутаг дэвсгэрийн 80 орчим хувь нь галд өртсөн тухай албаныхан мэдээлсэн. Өнөөдрийн байдлаар холбогдох ажлын хэсэг байгуулагдаж, хохирлыг тогтоон буруутай этгээдээр нөхөн төлүүлэхээр ажиллаж буй.
Энэ талаар УИХ-ын гишүүн О.Алтангэрэл байр сууриа илэрхийлж, Ерөнхий сайдад албан бичиг хүргүүлсэн талаар мэдээллээ. Тэрбээр "Нөмрөгийн дархан цаазат газар шатсанд хариуцлага хэрхэн тооцох тухай чуулганд үг хэлсний дараа зарим хүнээс "Танай тойрог биш биз дээ" гэсэн үг нэлээн сонслоо.
Тойрог гэдэг үг, улс төр гэдэг хайрцаггүйгээр хэлэхэд Нөмрөг миний, бас таны нутаг аа. Хархираа түргэний уулс, Хөвсгөлийн тайга, Хангай, Хэнтийн нуруу, Говийн их дархан газар ч бас бидний нутаг. Тэгээд ч би "Нийт иргэн, улсын эрх ашгийг эрхэмлэнэ" хэмээн тангараг өргөсөн хүн.
Чуулган дээр үг хэлэхээс 10 хоногийн өмнө Монгол Улсын Ерөнхий сайд Н.Учралд хандаж "Хариуцлага тооцож, шуурхай арга хэмжээ авах" тухай албан бичиг хүргүүлсэн" гэв.
