“Монгол иргэд зорилгоо тодорхойлж чадахгүй, бөглөсөн мэдээллээсээ зөрүүтэй зүйл ярих асуудал үүсгэсэн учраас ХИЛ ДЭЭРЭЭС БУЦААГДАЖ байна“

БНСУ-ын хил дээрээс монгол иргэд олноор буцаагдаж буй асуудлаар УИХ-ын дарга Д.Амарбаясгалан Гадаад харилцааны сайд Б.Батцэцэгээс асуулт асууж, хариулт авлаа.

Тэрбээр "Визээ авчхаад, яваад очхоор оруулахгүй ХҮНИЙ ЭРХИЙН ЗӨРЧИЛ үүсгээд буй явдалд ГХЯ ямар ажил хийв" гэж асуусан юм. Харин сайд Б.Батцэцэг "Бүх түвшинд БНСУ-ын талтай харилцаж байгаа. Монгол иргэд зорилгоо тодорхойлж чадахгүй, бөглөсөн мэдээллээсээ зөрүүтэй зүйл ярих, очих хаягаа мэдэхгүй байх гэх мэт асуудал үүсгэсэн учраас ХИЛ ДЭЭРЭЭС БУЦААХ явдал гарч байгаа" гэлээ.

Төгсгөлд нь УИХ-ын дарга "Солонгосын хил дээрээс иргэдийг буцааж байгаа асуудалд ГХЯ онцгой анхаарах хэрэгтэй. Нэг ч Монгол хүний эрх аль ч улсад зөрчигддөггүй байх ёстой" гэв.