Ж.Баярмаа: Сонгуулийн өмнөх дөрвөн жилд мөнгө, бэлэг тараах, амралтад амраах зэрэг санал авах зорилготой бүхнийг хориглох хэрэгтэй
УИХ-ын Төрийн байгуулалтын байнгын хороогоор “Монгол Улсын Засгийн газрын 2024-2028 оны үйл ажиллагааны хөтөлбөр батлах тухай” Улсын Их Хурлын тогтоолын төсөл /Засгийн газар 2024.08.12-ны өдөр өргөн мэдүүлсэн, анхны хэлэлцүүлэг/-ийг үргэлжлүүлэн хэлэлцэв.
Энэ үеэр УИХ-ын гишүүн Ж.Баярмаа "Бид бүгд мэдэж байгаа. Санал худалдан авах ажиллагаа битүү явдаг. Зөвхөн сонгуулийн үеэр л мөнгө тараах, амралтад амраах зэргийг хориглоод, бусад үед зөвшөөрдөг байж болохгүй. Тиймээс нэг сонгуулийн цикл буюу 4 жилийн хугацаанд мөнгө, бэлэг тараах, амралтад амраах зэргийг хориглох хэрэгтэй. Тэгэхгүй бол бид хэзээ ч мөнгөний нөлөөллөөс ангижрахгүй.
Жишээлбэл, 2028 онд нэр дэвших хүн энэ 4 жилд мөнгө тараах зэргийг хийж болохгүй. Харин 2032 онд нэр дэвших бол мөнгө тарааж болж байгаа юм" гэх байр суурийг илэрхийллээ.
