МАН-ын Бага хурал ойрын өдрүүдэд хуралдаж, Ерөнхий сайдад нэр дэвшигчийг тодруулахаар яригдаж байна
Өчигдөр УИХ-ын чуулганы хуралдаанаар Ерөнхий сайдад итгэл үзүүлэх тогтоолыг хэлэлцэж, шөнө 04.00 цагийн үед шийдвэрээ гаргасан билээ. Тодруулбал, 126 гишүүний олонх нь дэмжиж чадаагүй тул Ерөнхий сайд Л.Оюун-Эрдэнийг огцорсонд тооцох тухай тогтоолыг УИХ-ын дарга Д.Амарбаясгалан танилцуулсан юм.
Үндсэн хуульд заасанчлан 30 хоногийн дотор дараагийн Ерөнхий сайдыг томилох учиртай. Тийм учраас МАН дотооддоо хурал, уулзалтуудаа хийж, Ерөнхий сайдад хэнийг нэр дэвшүүлэхээ тодорхой болгох юм. Эх сурвалжийн мэдээлж буйгаар, ойрын өдрүүдэд МАН-ын Бага хурал хуралдахаар яригдаж буй бөгөөд хуралдааны тов хараахан тодорхой болоогүй аж.
Дашрамд дурдахад, Ерөнхий сайдад нэр дэвшигчийг тодруулсны дараа Монгол Улсын Ерөнхийлөгчтэй зөвшилцөж, улмаар УИХ-аар хэлэлцэх юм.
