“Цемент шохой“ ХХК-ийн гүйцэтгэх захирал Д.Баттүвшинг үүрэгт ажлаас нь чөлөөллөө

"Цемент шохой" ХХК-ийн ТУЗ-өөс тогтоол гарчээ. Тодруулбал, тус компанийн Гүйцэтгэх захирлын үүрэг гүйцэтгэгч Д.Баттүвшинг албан үүргээ хангалтгүй гүйцэтгэсэн, ХАБЭА-н горимыг удаа дараа зөрчсөн үндэслэлээр ажлаас нь чөлөөлсөн байна. Улмаар өнөөдөр буюу есдүгээр сарын 9-ний дотор Ажил хүлээлцүүлэх ажлыг холбогдох хууль, журмын дагуу зохион байгуулахыг Ажлын хэсэгт даалгажээ.

Сануулахад, ЗГХЭГ-ын дарга С.Бямбацогт өмнө нь хэвлэлд мэдээлэл хийхдээ "Хөтөлийн "Цемент шохой" ХХК нь сүүлийн хоёр жил дараалан аудитаас сөрөг дүгнэлт авсан. Мөн нэг тонн цемент үйлдвэрлэхээ бүрдээ алдагдалтай ажиллаж, одоо үйл ажиллагаа нь зогсонги байдалд орсон" гэж мэдэгдэж байсан юм.

Тэгвэл ийнхүү Гүйцэтгэх захирлын үүрэг гүйцэтгэгч Д.Баттүвшинг ажлаас нь чөлөөлж, оронд нь Гүйцэтгэх захирлын үүргийг түр орлон гүйцэтгэгчээр Ерөнхий инженер Т.Алтанхуягийг томилсон байна.