Төлбөрөө төлөөгүй зорчигч автобусны жолоочтой хэрэлдэж, цүнхээрээ цохисныхоо дараа жолоочид гомдол гаргажээ

Нийтийн тээврийн бодлогын газрын 70044040 дугаарын утсанд энэ сарын 12-14-нд иргэдээс ирсэн талархал, санал, хүсэлт, гомдлыг хэрхэн шийдвэрлэснийг хүргэж байна.

Иргэний гомдол: Налайх дүүргийн иргэн Б.Жаргалсайхан: Ч:72 (Хөгжим бүжгийн коллеж-Богдхон амралт) чиглэлийн 5-225 гарааш дугаартай автобусны жолооч номын сангийн буудлаас маршрутын гэрлээ унтраагаад хүнээ авахгүй хоосон явсан.

Шийдвэрлэлт: “Сутайн буянт” ХХК-ийн жолооч Б.Батжаргалд торгуулийн арга хэмжээ тооцсон.

Иргэний гомдол: Чингэлтэй дүүргийн иргэн Бум-эрдэнэ: Ч:18Б (МҮИС-ТЭЦ-3) чиглэлийн 13-268 гарааш дугаартай тээврийн хэрэгслийн жолооч нь тамхи татсан. Тухайн иргэн тамхины харшилтай тул харшил нь хөдлөөд яаран буусан байна.

Шийдвэрлэлт: “Эрдэм транс” ХХК-ийн жолооч С.Санжаажавт торгуулийн арга хэмжээ тооцсон.

Иргэний гомдол: Баянзүрх дүүргийн иргэн Б.Бямбаноров: “Зорчигч тээвэр нэг” ОНӨААТҮГ-ын 1-080 гарааш дугаартай автобусны жолооч Ч:37 (Улаанхуарангийн эцэс-4-р хороолол) чиглэлд ажиллахдаа Улаанхуарангийн эцсийн зогсоолоос суусан чинь хэл амаар доромжилж зодох шахлаа. Арга хэмжээ авч хариу өгнө үү.

Шийдвэрлэлт: Камерын бичлэг шалгахад зорчигч төлбөрөө төлөөгүй жолоочтой хэрэлдэж, цүнхээрээ цохисон байна.

Иргэний гомдол: Хан-Уул дүүргийн иргэн Б.Мөнхцэцэг: “Зорчигч тээвэр нэг” ОНӨААТҮГ-ын 1-012 гарааш дугаартай автобусны жолооч Ч:71 (МУБИС-120 мянгат) чиглэлд ажиллахдаа Хүннү-2222-ын буудлаас суух гээд зогсож байхад урд байсан хүмүүсийг суулгачхаад хаалгаа хаагаад дайрчих шахаад явлаа.

Шийдвэрлэлт: Камерын бичлэг шалгахад Хүннү 2222 хороолол буудалд хүнээ буулгаж, суулгасан байна. Автобус хөдөлсний дараа нэг хүн автомашинаа түгжиж байгаа харагдсан.

Иргэний гомдол: Баянгол дүүргийн иргэн Р.Наранчимэг: “Эрдэмтранс” ХХК-ийн 13-163 гарааш дугаартай автобусны жолооч Ч:21Б (Вокзал-Дэнжийн 1000-ын эцэс) чиглэлд ажиллахдаа гар хаалгаараа хавчиж чирсэн. Гомдолтой арга хэмжээ авч хариу өгнө үү.

Шийдвэрлэлт: Камерын бичлэг шалгахад зорчигч суух гэснээ буцаж яваад дахин ирж хаалганд хавчуулагдсан суусан байна.

Иргэний гомдол: Баянзүрх дүүргийн иргэн Э.Даваажав. РД: Ч:10 (Гадна тойруугийн эцэс-ТЭЦ-3) чиглэлийн 25-078 гарааш дугаартай автобусны жолооч ТЭЦ-3 автобусны буудлаас хүнээ авахгүй явсан. Маш удаан хүлээсэн. Гомдолтой байна.

Шийдвэрлэлт: “Зорчигч тээвэр тав” ОНӨААТҮГ-ын жолооч Наранбатыг дуудан ирүүлж уулзахад буудал дээр хүн байхыг хараагүй гэсэн. Дахин ийм зөрчил гаргахгүй байхыг анхааруулж сануулсан.

Иргэний гомдол: Хан-Уул дүүргийн иргэн Г.Ганзориг: “Автотерминал трейд” ХХК-ийн 14-004, 14-034 гарааш дугаартай автобусны жолооч нар Ч:7 (Нисэх-Хүнсний 1-р дэлгүүр) чиглэлд ажиллахдаа Хүнсний 4-р дэлгүүрээс Алтай хотхоны автобусны зогсоол хүртэл хүнээ авахгүй явлаа.

Шийдвэрлэлт: “Автотерминал трейд” ХХК-ийн Тээвэр зохицуулагч Нарангэрэлд байгууллагын дотоод журмаар жолооч нартаа арга хэмжээ тооцон эргэж мэдэгдэх үүрэг өгсөн.

Иргэний гомдол: Баянгол дүүргийн иргэн М.Анхтуяа: Ч:42 (Зайсан-Та Чи) чиглэлийн 2-078 гарааш дугаартай автобусны жолооч Оргил рашаан сувилал буудлаас хүнээ аваагүй. Гомдолтой байна.

Шийдвэрлэлт: “Зорчигч тээвэр хоёр” ОНӨӨТҮГ-ын жолооч Х.Энхбаярт торгуулийн арга хэмжээ тооцсон.

Иргэний гомдол: Сонгинохайрхан дүүргийн иргэн Б.Халиун: Ч:44 (Нарангийн гол-Дүнжингарав худалдааны төв) чиглэлийн 13-222 гарааш дугаартай автобусны жолооч Сүмбэр орд буудлаас хүнээ аваагүй явсан. Гомдолтой байна арга хэмжээ авч өгнө үү.

Шийдвэрлэлт: “Эрдэм транс” ХХК-ийн 13-222 гарааш дугаартай автобусны камерын бичлэг шалгахад Сүмбэр орд буудлаас 20:46 цагт нэг хүн суусан байна.

Иргэний гомдол: Ч:7 (Нисэх-Хүнсний 1-р дэлгүүр) чиглэлийн 14-004 гарааш дугаартай автобус нь буудал зарлагч лед дэлгэцээ ажиллуулахгүй яваад байна. Арга хэмжээ авч өгнө үү.

Шийдвэрлэлт: “Автотерминал трейд” ХХК-ийн Тээвэр зохицуулагч Нарангэрэлд байгууллагын дотоод журмаар жолооч нартаа арга хэмжээ тооцон эргэж мэдэгдэх үүрэг өгсөн.

Иргэний гомдол: Сүхбаатарын талбайн эцсийн зогсоол дээр суудал болон дулаан бүхээггүй байдаг. Түгжрэлтэй үед дийлэнх автобуснууд нэг талдаа гараад ирэхгүй уддаг. Номын сангийн буудлаас суугаад талбай дээр зогсоод хөөж буулгасан.

Шийдвэрлэлт: Эцсийн зогсоол дээр бүх зорчигчид буусан байх ёстой тул жолоочийн зохих шаардлага тавьж зорчигчийг буулгасан байна.