Долоон харцага цолтны допингийн шинжилгээний хариуг зарлажээ
"Хийморь" төсөлд оролцсон улсын харцага цолтой найман бөхийн хоёроос допинг илэрсэн гэх мэдээлэл гарсан. Тэгвэл Монголын үндэсний бөхийн холбооноос өнөөдөр мэдэгдэл гарган, долоон харцага цолтны допингийн шинжилгээний хариуг ил болгожээ.
МҮБХ-ноос "Монгол Улсын харцага цолтой бөхчүүд өөрсдийн санаачилга, санхүүжилтээр допингийн хяналтын шинжилгээ өгсөн бөгөөд 2021 оны гуравдугаар сарын 31-ний өдөр 6 бөх, ковид халдварын улмаас 1 бөх 2021 оны 05-р сарын 13-ны өдөр өгсөн болно. Олон улсын допингийн эсрэг байгууллагын БНСУ дахь итгэмжилсэн лаборатори 6 бөхийн шинжилгээний хариуг МҮДЭБ-д 2021 оны 06-р сарын 10-ны өдөр, үлдсэн 1 бөхийн шинжилгээний хариуг 2021 оны 06-р сарын 19-ний өдөр ирүүлсэн байна.
МДЭҮБайгууллага шинжилгээний хариуг танилцуулах журмын дагуу бүх шинжилгээг нэгтгэн МҮБХ-нд 2021 оны 06-р сарын 21-ний өдөр ирүүллээ. Шинжилгээгээр бөхчүүдээс допингийн төрлийн ямар нэгэн бодис илрээгүй байна. Цэвэр, шударга өрсөлдөөнийг уриалж байгаа харцагуудадаа спортын өндөр амжилт хүсье" гэжээ.
