Х.Ганхуяг: 3х3 сагсан бөмбөгийн “Улаанбаатар Амазонс“ багийн эзэн, үүсгэн байгуулагчийн хувиар цаашид ч дэмжиж амжилт бүрд нь хамтдаа байх болно
Улаанбаатар хотноо болсон 3х3 сагсан бөмбөгийн ДАШТ-ээс "Мөнгөн" медаль хүртсэн Монголын үндэсний шигшээ багийн эмэгтэй тамирчдад Монгол Улсын Ерөнхийлөгч У.Хүрэлсүх МУГТ цол тэмдэг гардууллаа.
Мөн Ерөнхий сайдын нэрэмжит 500 сая төгрөгийн батламжийг шигшээ багийн охидод гардуулсан.
Тэгвэл "Улаанбаатар Амазонс" багийн эзэн, үүсгэн байгуулагч, УИХ-ын гишүүн Х.Ганхуяг "Дэлхийн дэд аварга охид маань өнөөдөр Монгол Улсын Гавьяат тамирчид боллоо. Багийн спортоор түүхэн дээд амжилт гаргаж Монгол Улсынхаа нэрийг дэлхийд тунхагласан охидоороо бахархаж байна. Баяр хүргэе.
3х3 сагсан бөмбөгийн "Улаанбаатар Амазонс" багийн эзэн, үүсгэн байгуулагчийн хувиар цаашид ч дэмжиж амжилт бүрд нь хамтдаа байх болно. Амжилтаа улам бүр ахиулж Олимп, дэлхийн аварга болж алтан соёмбот төрийн далбаагаа тун удахгүй дахин илүү өндөрт мандуулна гэж итгэж байна" хэмээжээ.
