БУРХАН ЦАГААН МАШИНЫ ЖОЛООЧ Б.Оюунцэцэг: Орон гэргүй байхын зовлонг мэддэг болохоор өдөр бүр 15 мянган төгрөг данснаасаа шууд татуулж, хуримтлал үүсгэн, цугласан мөнгөөрөө хүмүүст гэр авч өгдөг

“Би энэ дэлхийн хамгийн баян хүн гэж өөрийгөө боддог юм” хэмээн ярих “Бурхан цагаан” машины жолооч бүсгүйг Б.Оюунцэцэг гэдэг.

Тэрбээр бага балчир наснаасаа эхлэн жолооч эмэгтэй хүн үзэсгэлэнтэй харагддаг болохоор жолооч болох мөрөөдөл тээж, өдгөө 15 дахь жилдээ тээврийн жолоочийн ажлыг хийж яваа нь энэ.

Анх 19 настайдаа хөөрхөн хүүгийн ээж болж, 21 насандаа анх Улаанбаатар хот гэх их айлд хөл тавьж байжээ.

Б.Оюунцэцэг тэр үеийнхээ тухай ярихдаа “Тухайн үед цаг үе хэцүү байж дээ. Улаанбаатар хотод ирэхэд гэр орон байхгүй, очих газаргүй, өвлийн хүйтэнд нимгэн дан дээлтэй хүүхдээ тэврээд орцонд хүртэл хонож л явлаа. Одоо бодоход амьдралын хамгийн хэцүү үе маань тэр л байсан. Гэр оронгүй байна гэдэг их хэцүү. Тийм болохоор ч тэр үү, орон гэргүй хүмүүст өөрийнхөө чадах чинээгээр өргөө цагаан гэр авч өгдөг юм. Шинэ гэр авч өгч чадахгүй ч хуучин гэр аваад л тордоод, угааж арчаад өгчихдөг юм. Одоо 23 дахь айлаа гэр оронтой болгох гээд бэлдчихсэн байна даа. Өгөх өдрөө тэсэн ядан хүлээж байна. Өмнөөс нь баярлаад байдаг юм” гээд инээмсэглэл дүүрэн ярина.

Одоо тэрбээр 23 дахь өргөө цагаан гэрээ олон хүүхэдтэй, өрх толгойлсон эхэд бэлэглэхээр бэлдээд байгаа аж. Өмнөх 22 гэрээ бурхан болсон аав, ээжийнхээ араас хийж байгаа өчүүхэн буян хэмээн ярьдаг бол энэ удаагийн гэрээ жилийн өмнө алдсан ханьдаа зориулж байгаа гэнэ.

Б.Оюунцэцэгтэй ярилцахаар очиход түүний ажлын ачаалалтай үе нь байсан юм. Нисэхийн дэнж гэх газраас өөрөө модоо ачаад Шувуун фабрик рүү явж байлаа.

Өөрөө ачаагаа ачиж, буулгах нь түүний хувьд энгийн өдөр тутмын л ажил. Үйлчлүүлэгч ихтэй гэдэг нь түүний утасны дуудлагаас харж болохоор байлаа. Өдөрт багадаа 500, ихдээ 2000 дуудлага ирдэг аж. Шинэ жил, цагаан сар, ямар ч баяр байсан хамаагүй тэр ажилдаа л анхаарлаа хандуулдаг гэнэ.

Өөрийн гэсэн цагаан ачааны машинтай болоод жил гаруй болж байгаа бөгөөд машинаа “Бурхан цагаан” хэмээн нэрлэжээ. Өглөө түлшээ дүүргээд гарсан машин нь орой гэртээ ирэхэд түлшээ бараг дуусгасан байдаг гэнэ. Түүний хувьд энэ машин амьдралаа авч явах, үр хүүхдээ өсгөх, бусдад туслах боломжийг нь бүрдүүлдэг тул "Бурхан цагаан" хэмээн нэрлэсэн гэв.

Гэсэн ч тэрбээр энэ ажлаа зовлон гэж боддоггүй нь илт. Учир нь ажлаа л тасралтгүй хийж байвал сэтгэл санаа нь сайхан байдаг гэнэ. Тэр ч бүү хэл ажлаа хийж яваад хоёр хоног юм идээгүйгээ анзаараад “Өө, би чинь хоол идээгүй юм байна” гэж санах үе хүртэл байдаг ажээ. Бидэнтэй ярилцахын өмнөх шөнө ч гэсэн унтаагүй явж байгаагаа хэлсэн юм.

Түүний ингэж уйгагүй ажилладгийн цаана мөнгөнөөс илүү нэг шалтгаан байгаа тухай ч тэр ярьсан юм.

“Би жилийн өмнө ханиа алдсан. Хөхний хавдартай гэдгээ мэдээд 20-иод жил болж байгаа. Гэртээ байхаар өнгөрсөн амьдралаа ухрааж бодоод, элдэв янзын юм бодож сэтгэл санаагаа унагаагаад байдаг юм. Харин ажлаа хийгээд л явж байвал юун амьдрал бодох, ажлаа л бодно. Энэ гудамжаар явбал илүү ойрхон, хүний ачаа бараа эвдэлчихгүй юмсан гээд л сатаарчихдаг юм” гэнэ.

Түүний энэ ярианаас сонсоход өнгөрсөн амьдралдаа их зүйлийг туулж, их сэтгэлийн тэнхээ гаргаж даван туулсан нь харагдана.

Б.Оюунцэцэг: Би хоёрдугаар ангийн боловсролтой хүн

Түүний ээж дөрвөн хүүхдээ ганцаараа өсгөдөг, өрх толгойлсон эмэгтэй байжээ. Б.Оюунцэцэг ээждээ туслахаар хоёрдугаар ангиа төгсөөд сургуулиасаа гарсан байна. Тухайн үед картын бараанд оочирлодог, нийгэм, цаг үе шилжиж байсан хэцүү цаг үе байж. Тэрбээр өөрөөсөө ах хоёр ах, доороо нэг охин дүүтэй юмсанж.

https://www.facebook.com/share/v/18euZ3twSc/

Б.Оюунцэцэг тэднийхээ тухай ярихдаа “Ганц охин дүү минь хэдэн хүүхдийг минь харж өгнө. Хоёр ах маань түшиг тулгуур болж яваа. Би ахтай, дүүтэй, гурван сайхан хүүхэдтэй баян хүн дээ” гээд л инээд алдан ярина.

Түүний хань ч бас тээврийн жолооч мэргэжилтэй байж. 15 жил ханилсан ханиа жилийн өмнө тэнгэрийн орон руу явуулах нь Б.Оюунцэцэг болон түүний гурван хүүхдэд хүнд цохилт болсон нь аргагүй.

-Өдгөө 11 мянган хүний гарын алгыг дээш нь харуулжээ-

Гэсэн ч тэрбээр амьдралд нурсангүй. Гурван хүүхдэдээ тус бүрд нь амьдрах байр, орон сууцыг нь бэлдээд зогсохгүй, бүх л амьдралынхаа хугацаанд 11 мянган хүний гарын алгыг дээш нь харуулж, 22 ам бүлийг өргөө цагаан гэртэй болгожээ. Үүнийгээ бурхан болсон аав, ээж, ханийхаа араас хийж байгаа өчүүхэн буян гэж ярина. Тэрбээр ханиа алдсаны дараа ч 1000 хүнийг баярлуулжээ.

Өөрөө хөхний хорт хавдар гэх өвчинтэй тэмцэж яваа болохоор энэ жилээс Хавдар судлалын үндэсний төвд эмчлүүлж буй иргэдэд тусламжийн гараа сунгаж эхэлсэн байна. Мөн том хүү нь ээжийгээ БНСУ-д эмчилгээнд авч явдаг бөгөөд удахгүй дахин авч явахаар болжээ.

Б.Оюунцэцэг: Төрсөн нь биш өсгөсөн нь аав

Б.Оюунцэцэг ханийхаа тухай ярихдаа “Миний хань сайн аав, сайхан хань байсан. Тийм ч учраас би одоо гэрэлтэж яваа. Миний том хүүг өөрийн хүү шигээ л хайрлаж, өнгөтэй өөдтэй бүхнийг барьж гүйдэг, шинэ хувцас, тоглоом юу л байна хүүд минь өгдөг байсан. Миний хоёр дахь амьдрал шүү дээ. Би ер нь боддог юм. Төрүүлсэн нь биш, өсгөсөн нь аав хүн байдаг юм байна гэж.

Одоо миний хүү том залуу болсон. 25 настай, БНСУ-д гэр бүлээрээ ажиллаж, амьдардаг. Ээжийнхээ том түшиг тулгуур. Би одоо хоёр бага хүүхэдтэйгээ амьдардаг. Миний охин гэр орноо цэвэрлэнэ, ээжийнхээ хувцсыг угаана. Гэрийнхээ арын албыг авч явдаг. Энэ бүхнийхээ хажуугаар уран нугардаг авьяастай охин бий.

Бага хүү маань 24 цагийн цэцэрлэгт явдаг юм. Хүүхдэдээ цаг гаргах нь хомс байдаг болохоор аюулгүй гээд 24 цагийн цэцэрлэгт өгчихсөн. Бага хүү маань одоо сурчихсан. ‘Баяртай, ээжээ. Зөндөө мөнгө олоод хүүгээ ирж аваарай’ гээд л өөрөө цэцэрлэг рүүгээ гүйгээд орчихдог.

Хүн ер нь эд хөрөнгөнөөс илүү үр хүүхдээрээ, олноороо хүрээлүүлж явах сайхан даа. Миний хувьд өөрөө боловсролгүй хүн болохоор хүүхдүүдээ өөр шигээ харанхуй хүн болгохгүйн тулд боловсролд нь их анхаардаг юм. Өдөр бүр хоёр багынхаа хадгаламж руу 10, 10 мянган төгрөг данснаасаа татуулна. Сайн үйлсдээ 15 мянгыг татуулна. Тэгэхээр сайн үйлсээ хийхдээ мөнгө яана аа гэж санаа зовохгүй, инээж байгаад л юмнуудаа авчихдаг юм даа” хэмээн ярив.

Б.Оюунцэцэг бусдад туслахын зэрэгцээ үр хүүхдийнхээ ирээдүйг бэлдэж, өдөр бүр хөдөлмөрлөсөөр явна. Түүний хувьд баян байна гэдэг нь эд хөрөнгө ихтэй байх бус, хайртай хүмүүсээрээ хүрээлүүлж, бусдад туслах боломжтой амьдрахын нэр аж.

“Төрөх нь үнэн, үхэх нь үнэн. Тиймээс үр хүүхэд минь ‘Ээж минь ийм дайчин бүсгүй байсан шүү’ гэж дурсдаг байгаасай гэж хүсдэг” хэмээн Б.Оюунцэцэг хэлсэн юм.